Tezkun › Ma'lumotnoma › Elektr va gaz

2026-yil 1-iyundan aholi uchun elektr energiyasi va gaz tariflari

Tahririyat tekshirgan: 29-sentabr 2026. Raqamlar pastdagi manbalar roʻyxatidagi hujjatlar bilan solishtirilgan. Matn ruscha asl nusxadan tarjima qilingan — asl nusxani oʻqish.

2026-yil 1-iyundan Oʻzbekistonda aholi uchun elektr energiyasi va tabiiy gazga yangi tariflar amal qilmoqda. Ularni Vazirlar Mahkamasi 2026-yil 15-maydagi 243-son qarori bilan tasdiqladi, narxlar oʻrtacha 10 % ga oshdi. 2025-yildan boshlab tariflar har yili inflatsiya hisobga olingan holda, lekin har safar 10 % dan koʻp boʻlmagan miqdorda qayta koʻrib chiqiladi, shuning uchun keyingi oshishni 2027-yil bahorida kutish kerak.

Elektr energiyasi

Tarif bosqichli: oila bir oyda qancha koʻp isteʼmol qilsa, keyingi har bir kilovatt-soat shuncha qimmatroq boʻladi. Ijtimoiy meʼyor — oyiga 200 kVt·soat.

Bir oylik isteʼmol	1 kVt·soat narxi
200 kVt·soatgacha	650 soʻm
201 dan 500 kVt·soatgacha	900 soʻm
501 dan 1 000 kVt·soatgacha	1 100 soʻm
1 001 dan 5 000 kVt·soatgacha	1 600 soʻm
5 001 dan 10 000 kVt·soatgacha	1 900 soʻm
10 000 kVt·soatdan ortiq	2 200 soʻm

Bosqichlar ketma-ket qoʻllanadi: dastlabki 200 kVt·soat doim 650 soʻmdan, keyingi 300 kVt·soat — 900 soʻmdan va shu tariqa hisoblanadi.

Gaz boʻlmagan, markazlashtirilgan elektr plitalari oʻrnatilgan koʻp kvartirali uylar va yotoqxonalar uchun imtiyozli tarif saqlab qolingan: 200 kVt·soatgacha — 325 soʻm, 201 dan 500 kVt·soatgacha — 450 soʻm, 501 dan 1 000 kVt·soatgacha — 550 soʻm.

Tabiiy gaz

Ijtimoiy meʼyor mavsumga bogʻliq: isitish mavsumida — oyiga 500 kub metrgacha, boshqa oylarda — 100 kub metrgacha. Noyabrdan fevralgacha boʻlgan oylar, Qoraqalpogʻiston va Xorazm viloyatida esa oktabrdan fevralgacha boʻlgan oylar isitish mavsumi hisoblanadi. Energetika vazirligi ob-havoga qarab bu muddatlarni oʻzgartirishi mumkin va bu haqda oʻz saytida eʼlon qiladi.

Bir oylik isteʼmol	1 m³ narxi
ijtimoiy meʼyor doirasida	1 100 soʻm
meʼyordan ortiq, 2 500 m³ gacha	2 000 soʻm
2 501 dan 5 000 m³ gacha	2 300 soʻm
5 001 dan 10 000 m³ gacha	2 700 soʻm
10 000 m³ dan ortiq	3 300 soʻm

Hisob-kitob misollari

Vaziyat	Hisob-kitob	Jami
Kvartira, bir oyda 180 kVt·soat	180 × 650	117 000 soʻm
Hovli uy, bir oyda 350 kVt·soat	200 × 650 + 150 × 900	265 000 soʻm
Yozda gaz, 80 m³	80 × 1 100	88 000 soʻm
Qishda gaz, 400 m³	400 × 1 100	440 000 soʻm
Qishda gaz, 700 m³	500 × 1 100 + 200 × 2 000	950 000 soʻm

Ehtiyojmand oilalar uchun kompensatsiyalar

Ijtimoiy reyestrga kiritilgan oilalarga davlat 2027-yil 1-aprelgacha bazaviy va oshirilgan tarif oʻrtasidagi farqni kompensatsiya qiladi: elektr energiyasi boʻyicha — oyiga meʼyordan ortiq 150 kVt·soatgacha isteʼmol uchun, gaz boʻyicha — isitish mavsumida oyiga 250 kub metrgacha va boshqa oylarda 150 kub metrgacha. Kompensatsiya olish huquqi reyestrda boʻlmagan oilalarda ham bor, agar ular ehtiyojmandlik mezonlariga toʻgʻri kelsa va ularda bir kishiga toʻgʻri keladigan daromad minimal isteʼmol xarajatlarining bir yarim baravaridan yuqori boʻlmasa.

Kompensatsiyani bir marta rasmiylashtirish kerak. Anketa oyning 16-sanasigacha topshiriladi: davlat xizmatlari markazida, «Inson» ijtimoiy xizmatlar markazida, oʻz mahallasining ijtimoiy xodimi orqali yoki my.gov.uz portalida mustaqil ravishda. Xizmat bepul. Oila va isteʼmol toʻgʻrisidagi maʼlumotlarni tizim oʻzi tekshiradi, pullar keyingi oyning 27-sanasigacha ijtimoiy yoki bank kartasiga kelib tushadi. Keyinchalik toʻlov har oy yangi arizalarsiz uzaytiriladi.

Qanday qilib kamroq toʻlash mumkin

200 kVt·soat chegarasini kuzatib boring: meʼyordan ortiq kilovatt-soat 38 % ga qimmatroq.
Hisoblagich koʻrsatkichlarini oʻz vaqtida uzating, aks holda ikki oylik hajm bitta deb hisoblanishi va uning bir qismi qimmat bosqichga oʻtib ketishi mumkin.
Hisoblangan summalarni yetkazib beruvchining shaxsiy kabinetida yoki oʻz bankingiz ilovasida tekshirishingiz mumkin, u yerda har bir bosqich boʻyicha qancha ketgani ham koʻrinadi.

Manbalar

Hujjatlar nomlari asl nusxadagidek, rus tilida.

Xato topdingizmi yoki hujjat yangilandimi? Aloqa sahifasi orqali bizga yozing.