Oʻzbekiston Paraosiyo oʻyinlari-2026 ning birinchi kunida 23 ta medalni qoʻlga kiritdi

Terma jamoaga ilk oltin medalni Bobur Toshtemirov keltirdi. U velotrekda 3 km masofaga individual taʼqib poygasida gʻalaba qozondi. Oʻzbekiston Milliy paralimpiya qoʻmitasi matbuot xizmati maʼlumotlariga koʻra, u finalda Janubiy Koreyalik raqibini 3 daqiqa 41,263 soniya natija bilan ortda qoldirib, musobaqa rekordini oʻrnatdi. Bu Oʻzbekistonning Paraosiyo oʻyinlaridagi ishtiroki tarixida paravelosport boʻyicha ilk oltin mukofot boʻldi.

Yana beshta gʻalaba parasuzish va paraengil atletika hissasiga toʻgʻri keldi. Lolaxon Qodirova S5 toifasida 50 metr masofaga erkin usulda 37,88 soniyada suzib oʻtdi, bu yangi Osiyo rekordidir. Mahliyo Akramova (toʻqmoq uloqtirish, 24,08 m) va Qudratilloxon Maʼrufxoʻjayev (yadro uloqtirish, F37 toifasi, 16,66 m) Oʻyinlar rekordlarini yangiladi. Shuningdek, Husniddin Norbekov (yadro uloqtirish, F35) va Yegor Bolotov (100 m erkin usulda suzish, S13) ham oltin medalga sazovor boʻldi. Oʻzbekistonliklar kumush va bronza medallarini paradzyudo, parataekvondo, parasuzish hamda paraengil atletika boʻyicha qoʻlga kiritdilar.

Oʻyinlar yakshanba kuni Nagoyadagi «Midzuxo» stadionida ochildi. Dasturda sportning 18 turi va 492 ta medallar jamlanmasi mavjud. Oʻzbekiston 11 ta sport turida 149 nafar sportchini, shu jumladan ilk bor paraqilichbozlik, bochcha va parakamondan otish boʻyicha qatnashchilarni namoyish etdi. Ochilish marosimida mamlakat bayrogʻini Asadbek Toshtemirov va Marjona Pardaboyeva koʻtarib oʻtdi. OʻzA xabariga koʻra, olov estafetasida Osiyo Paralimpiya qoʻmitasi prezidenti Majid Rashid mashʼalani Oʻzbekiston Milliy paralimpiya qoʻmitasi raisining birinchi oʻrinbosari Shahnoza Mirziyoyevaga topshirdi.