Oʻzbekiston U-23 terma jamoasi Osiyo oʻyinlarining bronza medali uchun bahsda Xitoyga imkoniyatni boy berdi

Toyota stadionida oʻtgan uchrashuvning asosiy vaqti 2:2 hisobida yakunlandi. 15-daqiqada Xitoy terma jamoasi oʻyinchisi Xu Xetao hisobni ochdi, ammo 43-daqiqada Sardorbek Bahromov muvozanatni tikladi. 53-daqiqada Van Yuyvey Xitoyni yana hisobda oldinga olib chiqdi. 90-daqiqada Shodiyor Shodiboyev javob toʻpini kiritdi.

Turnir reglamentiga koʻra qoʻshimcha vaqt oʻynalmadi va jamoalar toʻgʻridan-toʻgʻri penaltilar seriyasiga oʻtdi, unda Xitoy terma jamoasi 4:3 hisobida gʻalaba qozondi. Natijada Xitoy bronza medallarini qoʻlga kiritdi, Oʻzbekiston terma jamoasi esa turnirni toʻrtinchi oʻrinda yakunladi.

Guruh bosqichida Ravshan Haydarov jamoasi har uchala oʻyinda gʻalaba qozondi, chorak finalda Saudiya Arabistonini 3:0 hisobida magʻlub etdi, yarim finalda esa Yaponiya bilan durang oʻynab (1:1), xuddi shunday tarzda penaltilar seriyasida imkoniyatni boy bergandi.