Oʻzbekistonning ikki sportchisi doping-testlar sababli Osiyo oʻyinlaridan vaqtincha chetlatildi

Yaponiyada musobaqadan tashqari paytda olingan sinamalarda kanoechi Pavel Eygeldan trimetazidin (23-sentabrdagi sinama), aralash yakkakurash ustasi Nodirbek Shavkatovdan esa meldoniy (22-sentabrdagi sinama) topildi. Har ikkala preparat WADA taqiqlangan roʻyxatining S4 toifasiga ("Gormonlar va metabolizm modulyatorlari") kiradi hamda musobaqa vaqtida ham, musobaqadan tashqari paytda ham taqiqlangan hisoblanadi.

Butunjahon antidoping kodeksi va Osiyo Olimpiya kengashi qoidalariga koʻra, atletlar tekshiruvlar yakunlanguniga qadar chetlatildi. Ularga Osiyo oʻyinlari doirasida musobaqalarda qatnashish, mashgʻulot oʻtkazish va har qanday sport faoliyatida ishtirok etish taqiqlangan. Shu bilan birga, Shavkatov bundan oldin 71 kg gacha boʻlgan vazn toifasida bronza medalini qoʻlga kiritgan edi.

Sportchilar B sinamasini ochish va tekshirishni talab qilish, shuningdek, vaqtincha chetlatish ustidan Sport arbitraj sudi Antidoping boʻlimiga (CAS ADD) shikoyat qilish huquqiga ega. Jarayonlar yakunlanguniga qadar ITA boshqa izoh berishdan tiyiladi.