Oʻzbekistonda ATP va WTA tennis turnirlarini oʻtkazish qayta tiklanadi

Xalqaro turnirlar xarajatlari va sovrin jamgʻarmasini moliyalashtirish xayriya ejsonglari hisobidan koʻzda tutilgan. ATP, WTA va ITF musobaqalaridan tashqari, respublikada Oʻzbekiston kubogi, respublika birinchiliklari, Uzbekistan Open turniri hamda erkaklar oʻrtasidagi ATP Challenger doimiy asosda oʻtkazilishi rejalashtirilgan.

2027-yil 1-yanvardan umumtaʼlim maktablarida Juniors Tennis Initiative dasturi boshlanadi: boshlangʻich tennis mashgʻulotlari 1–4-sinflar uchun jismoniy tarbiya darslariga kiritiladi. Tanlab olingan maktablar uchun Oʻzbekiston tennis federatsiyasi inventar va tennis wall devorlarini xarid qiladi, mashgʻulotlarni esa mahalliy sport maktablari mutaxassislari olib boradi. Respublika olimpiya zaxiralari tennis maktabi boshqaruvi Sport vazirligidan Tennis federatsiyasiga oʻtadi, federatsiyaga xorijiy mutaxassislarni jalb qilish topshirilgan.

Shuningdek, 2027-yildan boshlab sport-taʼlim muassasalarining kortlari pulli xizmatlar narxlarini mustaqil belgilash huquqi bilan oʻzini oʻzi moliyalashtirishga oʻtkaziladi. Tushumlar kommunal xarajatlarni toʻlashga yoʻnaltiriladi, zarar koʻrib ishlayotgan obyektlarni esa mavjud guruhlar uchun bepul mashgʻulotlarni saqlab qolish sharti bilan DXSH orqali xususiy investorlarga berish mumkin boʻladi.

2030-yilga kelib tennis bilan muntazam shugʻullanuvchilar sonini 3000 nafarga, murabbiylar sonini 200 nafarga yetkazish, shuningdek, Osiyoning yetakchi beshta davlati qatoriga kirish maqsadi qoʻyilgan. Hujjatda Osiyo va Paraosiyo oʻyinlari medallari uchun toʻlovlar ham belgilandi: sportchilarga — 6250 dan 25 ming dollargacha, murabbiylarga — 2500 dan 10 ming dollargacha.