Toshkent dorixonalarida dori narxlarining olti baravargacha oshirib yuborilgani aniqlandi

Narxlarni oshirib yuborish holatlari qoʻmita mutaxassislari tomonidan «sirli xaridor» usulidagi nazorat tadbirlari davomida qayd etildi. Xususan, «SHUNQORLAR» MCHJ dorixonasida «Konvuleks» tomchilari belgilangan meʼyor 66 481 soʻm boʻlgani holda 395 000 soʻmga (deyarli 6 baravar qimmat), «Polimik» preparati esa 12 837,18 soʻm oʻrniga 70 000 soʻmga sotilgan. «MUNO FARM» MCHJ dorixonasida «Stimuloton» tabletkalari belgilangan 50 666,17 soʻm oʻrniga 295 000 soʻm boʻlgan.

«Baktamed» preparati narxining oshirilishi «CITY FARM» MCHJda qayd etilib, u yerda dori 18 849,43 soʻm oʻrniga 63 000 soʻmga, «AMIR FARM TRADE» MCHJda esa 20 foiz oʻrniga 100 foizlik ustama qoʻllangan holda 32 000 soʻmga sotilgan. «HOSIL FARM» MCHJ dorixonasida «Lantus SOLOSTAR» preparati uchun ruxsat etilgan 115 173,3 soʻm oʻrniga 190 000 soʻm talab qilingan, «Slideron» tabletkalari esa meʼyor 115 677,1 soʻm boʻlgan holda 349 000 soʻmga taklif etilgan. «No-shpa» preparatining cheklangan narxlaridan oshirilishi «CITY FARM», «LEADER PHARMGROUP» XK, «PHARM S GOLDEN» MCHJ va «RUSLAN BUYUK FARM» MCHJ dorixonalarida aniqlandi.

Aniqlangan qoidabuzarliklar boʻyicha antimonopoliya qoʻmitasi majburiy koʻrsatmalar berdi. Subyektlar tomonidan litsenziya talablariga rioya etilishini koʻrib chiqish uchun materiallar va soʻrovlar litsenziyalovchi organlarga yuborildi.