Toshkent dorixonalarida dori narxlarining 6 baravargacha oshirilgani aniqlandi

Narxlarning oshirib yuborilgani qoʻmita mutaxassislari tomonidan «sirli xaridor» usulida oʻtkazilgan nazorat tadbirlari davomida qayd etildi. Xususan, «SHUNQORLAR» MChJ dorixonasida «Konvuleks» tomchilari belgilangan 66 481 soʻm oʻrniga 395 000 soʻmga (deyarli 6 baravar qimmat), «Polimik» preparati esa 12 837,18 soʻm oʻrniga 70 000 soʻmga sotilgan. «MUNO FARM» MChJ dorixonasida «Stimuloton» tabletkalari belgilangan 50 666,17 soʻm oʻrniga 295 000 soʻmga sotilgan.

«Baktamed» preparati narxining oshirilishi «CITY FARM» MChJda qayd etilib, u yerda dori 18 849,43 soʻm oʻrniga 63 000 soʻmdan, «AMIR FARM TRADE» MChJda esa 20 foiz oʻrniga 100 foizlik ustama qoʻllangan holda 32 000 soʻmga sotilgan. «HOSIL FARM» MChJ dorixonasida «Lantus SOLOSTAR» preparati uchun ruxsat etilgan 115 173,3 soʻm oʻrniga 190 000 soʻm soʻralgan, «Slideron» tabletkalari esa 115 677,1 soʻm miqdoridagi meʼyor oʻrniga 349 000 soʻmdan taklif qilingan. «No-shpa» preparatiga cheklangan narxlarning oshirilishi «CITY FARM», «LEADER PHARMGROUP» XK, «PHARM S GOLDEN» MChJ va «RUSLAN BUYUK FARM» MChJ dorixonalarida aniqlandi.

Aniqlangan qoidabuzarliklar boʻyicha antimonopoliya qoʻmitasi majburiy koʻrsatmalar berdi. Subyektlar tomonidan litsenziya talablariga rioya etilishini koʻrib chiqish uchun materiallar va soʻrovlar litsenziyalovchi organlarga yuborildi.