Deputatlar Tibbiyot xodimlari kunining nomini oʻzgartirishni maʼqulladi

Tuzatishlar amaldagi «Oʻzbekiston Respublikasi tibbiyot xodimlari kunini belgilash toʻgʻrisida»gi qonunga tegishli boʻlib, undagi «tibbiyot xodimlari» jumlasini «tibbiyot va farmatsevtika xodimlari»ga almashtirish taklif etilmoqda. Bayram noyabr oyining ikkinchi yakshanbasida nishonlanadi; Anhor.uz maʼlumotlariga koʻra, sanani oʻzgartirish rejalashtirilmagan.

Qonun loyihasi mualliflarining fikricha, ushbu oʻzgarish bayram toʻgʻrisidagi qonun atamalarini «Fuqarolar sogʻligʻini saqlash toʻgʻrisida» hamda «Dori vositalari va farmatsevtika faoliyati toʻgʻrisida»gi qonunlardagi tushunchalar bilan muvofiqlashtiradi. Deputatlar, shuningdek, yangi nom jamiyatda farmatsevtlarning maqomini oshirishga hamda ularni moddiy va maʼnaviy qoʻllab-quvvatlashga xizmat qiladi, deb hisoblaydi.

Majlisda sohaga oid maʼlumotlar keltirildi: mamlakatda 50 mingdan ortiq farmatsevt, 504 ta dori vositalari ishlab chiqaruvchi korxona, 478 ta distribyutor va 14 mingdan ortiq dorixona mavjud. Muhokama chogʻida soʻzga chiqqan deputat Baxtiyor Ortiqov Oʻzbekistonda onalar va chaqaloqlar oʻlimi ikki baravarga kamayganini maʼlum qildi.