Vazirlar Mahkamasi pensiyalarni tayinlashning ixcham tizimi boʻyicha tajribani tasdiqladi

2026-yilning oktabr–dekabr oylarida tajriba oʻtkaziladigan hududlarda pensiyalarni tayinlash va qayta hisoblash, ularning turini oʻzgartirish hamda toʻlovlarni tashkil qilish bilan tuman va shahar boʻlimlari emas, balki Pensiya jamgʻarmasining hududiy boshqarmalari shugʻullanadi. Tajribaga Andijon va Samarqand shaharlari, Andijon viloyatining Oltinkoʻl tumani, Xorazm viloyatining Urganch, Xiva shaharlari, Shovot va Yangiariq tumanlari, shuningdek butun Sirdaryo viloyati kiritildi. Har bir tuman va shahar boʻyicha qarorlar uch kishidan iborat komissiyalar tomonidan qabul qilinadi.

Aholining arizalarni topshirishi avvalgidek mahalliy boʻlimlarda amalga oshiriladi: u yerda hujjatlar qabul qilinadi, murojaat Face ID orqali roʻyxatdan oʻtkaziladi va oʻsha kunning oʻzidayoq skanerlangan nusxalar boshqarmaga yuboriladi. 15-dekabrga qadar Iqtisodiyot va moliya vazirligi hamda Pensiya jamgʻarmasi hukumatga hududiy boshqarmalar huzuridagi ixcham xizmat koʻrsatish ofislarini 2027-yil 1-yanvardan butun mamlakat boʻylab joriy etishni nazarda tutuvchi hujjat loyihasini kiritishi lozim. Shu sanadan boshlab, Upl.uz’ning Pensiya jamgʻarmasi matbuot xizmatiga tayanib xabar berishicha, jamgʻarma qogʻoz shaklidagi hujjatlarni qabul qilishni toʻxtatadi.

Qaror, shuningdek, alohida arizasiz koʻrsatiladigan xizmatlar roʻyxatini kengaytiradi: xususan, pasport yoki ID-karta almashtirilgandan soʻng pensiya toʻlash davom ettiriladi, 100 yoshga toʻlgan fuqarolarga esa ustama toʻlov avtomatik tarzda tayinlanadi. Elektron pensiya guvohnomasi avtomatik tarzda — Yagona interaktiv davlat xizmatlari portalidagi pensioner kabinetida yoki «Ijtimoiy karta» ilovasida shakllantiriladi. Chet eldagi naqd pulsiz shaklda toʻlov oluvchi pensionerlar pensiya olish huquqini har uch oyda MyID orqali tasdiqlashlari mumkin boʻladi.