Prezidentga qutqaruvchilarning yetib borish vaqtini 5–7 daqiqagacha qisqartirish taklif etildi

Prezident “oltin daqiqa” tamoyilini joriy etishni topshirdi. Buning uchun aholisi 250 ming kishidan ortiq boʻlgan shahar va tumanlardagi 25 ta yongʻin-qutqaruv qismini qayta tashkil etish va ularni yangi texnika bilan jihozlash rejalashtirilmoqda. Shuningdek, murakkab sharoitlarda ishlash uchun “Madad” milliy qutqaruv markazi, havo transportida qutqaruvchilar boʻlinmasi hamda favqulodda vaziyatlarni boshqarish sohasida ilmiy markaz tashkil etish taklif qilindi.

“112” xizmatida murojaatlarni nazorat qilish barcha bosqichlarda — qabul qilinishidan to ijrosigacha kuchaytiriladi, favqulodda xizmatlar oʻrtasida maʼlumot almashinuvini esa raqamli texnologiyalar va sunʼiy intellektga tayangan holda yaxshilash rejalashtirilmoqda. Qutqaruvchilar texnikumida gʻavvoslarni dual tizim asosida tayyorlash, turistik obyektlar xodimlarini esa birinchi yordam koʻrsatish va favqulodda vaziyatlardagi harakatlarga oʻrgatish koʻzda tutilgan.

Taqdimotda maʼlum qilingan maʼlumotlarga koʻra, mamlakatdagi 56 ta suv omboridan faqat toʻrttasida professional qutqaruv xizmatlari mavjud. Boʻlinmalarni “Karkidon” suv ombori misolida tashkil etish taklif etildi. Suv havzalari yaqinidagi turistik xizmatlar uchun majburiy sertifikatlashtirish va qutqaruv xizmatlari bilan shartnomalar tuzish, tadbirkorlar uchun esa 2029-yil 1-oktabrgacha yer va mol-mulk soliqlarini ikki baravarga kamaytirish hamda olib kirilayotgan GPS uskunalari, qutqaruv va himoya vositalari boʻyicha bojxona toʻlovlarini 120 kunga kechiktirish yoki boʻlib-boʻlib toʻlash imkoniyati taklif etildi.

Taqdimot yakunlari boʻyicha idoralarga qutqaruv xizmatlari ishini tezlashtirish va turistik obyektlar uchun xavfsizlik talablarini belgilash topshirildi.