Qozogʻiston 2027-yil iyulidan kirish uchun majburiy elektron ruxsatnomalarni joriy etadi

Qozogʻiston hukumatining 10-oktabrdagi qarori 2026-yil 24-oktabrdan kuchga kiradi. Hujjatga muvofiq, vizasiz rejim boʻyicha keluvchi chet el fuqarolari raqamli identifikatsiyadan oʻtgach, raqamli platforma orqali safarga kamida 72 soat qolganida QazETA tizimida ruxsatnoma olish uchun ariza topshirishlari kerak. Ruxsatnoma 180 kalendar kunlik amal qilish muddati bilan bepul beriladi, shu bilan birga u mamlakatda boʻlish muddatlari boʻyicha amaldagi cheklovlarni bekor qilmaydi.

Tizimni joriy etish bir necha bosqichda amalga oshiriladi. 2026-yil 1-noyabrdan tekshiruv Aktau xalqaro aeroportida hamda toʻrtta avtomobil oʻtkazish punktida («Urlyutyube», «Auxatti», «Atameken» va «Nurli Joʻl») boshlanadi. 2027-yil 1-yanvardan tizim Ostona va Olmaota aeroportlarida ishga tushiriladi, 2027-yil 1-martdan esa qolgan oʻtkazish punktlari ulanadi. 2027-yil 1-iyulgacha chegara xizmati xodimlari hujjatsiz chegarani kesib oʻtishni rad etmagan holda, kirish tartibini tushuntiradilar. Talab 2027-yil 1-iyuldan boshlab majburiy boʻladi.

16 yoshdan kichik bolalar, 65 yoshdan oshgan fuqarolar, amaldagi Qozogʻiston vizalari, vaqtincha yashash uchun ruxsatnomalari yoki doimiy yashash guvohnomasiga ega boʻlgan shaxslar ruxsatnomani rasmiylashtirish majburiyatidan ozod qilinadi. Shuningdek, ushbu talab diplomatlar, rasmiy delegatsiya aʼzolari, tranzit aviyoʻlovchilar, havo va suv kemalari ekipajlari, poyezd brigadalari hamda xalqaro yuk reyslari va avtobuslar haydovchilariga tatbiq etilmaydi.