Oʻzbekistonlik shifokor Toshkentdan Seulga uchayotgan reysda yoʻlovchi ayolni qutqarishga yordam berdi

Hodisa 11-oktabr kuni Uzbekistan Airways aviakompaniyasining samolyoti bortida sodir boʻlgan. Parvoz chogʻida ekipaj aʼzolari ovozkuchaytirgich orqali yoʻlovchilarga murojaat qilib, tibbiyot mutaxassisidan yordam soʻrashgan. Ushbu chaqiriqqa Samarqanddagi xususiy klinikani boshqarayotgan va Janubiy Koreyada malaka oshirayotgan shifokor-otorinolaringolog Hasan Komilov javob bergan.

Sogʻliqni saqlash vazirligi maʼlumotiga koʻra, hushini yoʻqotgan yoʻlovchida shok holati belgilari kuzatilgan: tananing sovishi va teri qoplamalarining koʻkarishi (Podrobno.uz maʼlumotlariga koʻra, bosim va puls sezilmagan, Threads tarmogʻidagi guvoh esa diastolik bosim 20 gacha tushib ketganini bildirgan). Shifokor shoshilinch yordam preparatlarini, shuningdek bortkuzatuvchilar tomonidan taqdim etilgan bort dorilar toʻplami va kislorod niqobini qoʻllagan.

10–15 daqiqa ichida Koreya Respublikasi fuqarosining ahvoli meʼyoriga kelgan, samolyot parvozni davom ettirgan va favqulodda qoʻnishsiz belgilangan manzilga yetib borgan. Ayolga yordam koʻrsatishda reysdagi yoʻlovchilar va ekipaj aʼzolari ham ishtirok etgan.