Rossiya IIV RTT rezidentlari xodimlari uchun imtihonlarni bekor qilishni taklif qildi

«Rossiya Federatsiyasida chet el fuqarolarining huquqiy holati toʻgʻrisida»gi qonunga oʻzgartirishlar kiritish loyihasi 12-oktabr kuni eʼlon qilindi. Tuzatishlar RF bosh vaziri oʻrinbosari va prezidentning Uzoq Sharq federal okrugidagi vakolatli vakili Yuriy Trutnev huzuridagi 2026-yil 29-apreldagi yigʻilish bayonnomasini ijro etish maqsadida ishlab chiqilgan. Taklif etilayotgan choralar kelib chiqish mamlakatidan qatʼi nazar xorijiy fuqarolarga nisbatan tatbiq etiladi.

Idorada majburiy imtihonlarning bekor qilinishi ish beruvchilarga chet ellik mutaxassislarni tezroq ishga qabul qilishga yordam berishi va investitsiya muhitini yaxshilashi tushuntirildi. Tushuntirish xatidagi maʼlumotlarga koʻra, Rossiyada 90 dan ortiq rivojlanish tezlashtirilgan hudud mavjud boʻlib, ulardagi 1,5 mingdan ziyod rezidentlar 140 mingdan ortiq ish oʻrni yaratgan, shu bilan birga korxonalar kadrlar taqchilligini boshdan kechirmoqda. RF Iqtisodiy rivojlanish vazirligi Uzoq Sharqda 16 ta va Arktika zonasida 2 ta RTT faoliyat yuritayotganini qayd etadi.

Tashabbus hozircha qonun loyihasi bosqichida boʻlib, rasmiy qaror qabul qilingunga qadar imtihon topshirishning umumiy tartibi amalda qoladi. Oʻzbekiston Migratsiya agentligi tuzatishlarning koʻrib chiqilishini kuzatib borayotganini va qaror qabul qilingach fuqarolarni xabardor qilishini bildirdi.