Misr 1-noyabrdan Oʻzbekiston fuqarolarining kirishi uchun yangi talablar joriy qilmoqda

Diplomatik missiya maʼlumotlariga koʻra, kirish vizasini oldindan Misrning diplomatik vakolatxonalari orqali rasmiylashtirish talab etiladi, sayyohlik safarlari esa vakolatli turoperatorlar orqali tashkil etilishi kerak. Xususan, oldindan rasmiylashtirilgan vizasiz Sharm-al-Shayx va Sinay yarim orolining boshqa hududlariga borishning imkoni boʻlmaydi.

40 yoshdan kichik boʻlgan sayyohlar mamlakatga faqat yaqin qarindoshlari — ota-onasi, turmush oʻrtogʻi yoki farzandlari bilan birga kirishlari mumkin boʻladi. Bunday oila oʻzi bilan kamida 5000 dollar naqd pulga ega boʻlishi lozim. Mustaqil ravishda ketayotgan 40 yoshdan katta sayohatchilar esa kamida 3000 dollar miqdorida naqd pul mablagʻiga ega boʻlishlari kerak.

Chegarada shuningdek mehmonxona band qilinganligi toʻgʻrisidagi hujjatni, mobil aloqa haqidagi maʼlumotlarni va moliyaviy mablagʻlar tasdigʻini taqdim etish talab qilinadi. Misrda boʻlish davrida sayyohlik vizasi toifasini oʻzgartirishning imkoni boʻlmaydi. Kerakli hujjatlarning toʻliq toʻplamiga ega boʻlmagan yoʻlovchilarga kirish rad etilishi va ular olib kelgan aviakompaniya reysi bilan ortga qaytarilishi mumkin.