«Oʻzbekneftgaz» CNPC bilan Xitoydan benzin va dizel yoqilgʻisi xarid qilishni muhokama qilmoqda

Moʻminovning soʻzlariga koʻra, oktan soni 92 va undan yuqori boʻlgan benzin hamda dizel yoqilgʻisi importi koʻrib chiqilmoqda. Bundan tashqari, tomonlar Buxoro neftni qayta ishlash zavodida qayta ishlash uchun neft va gaz kondensati yetkazib berish hajmini oshirishni muhokama qilmoqda. Boshqaruv raisi oʻrinbosari tushuntirganidek, hajmlar ichki talabdan kelib chiqib belgilanadi. Muzokaralardan maqsad — importni diversifikatsiya qilish va neft mahsulotlari taʼminotidagi uzilishlar xavfini kamaytirish (Kursiv matbuot anjumani sanasini 30-oktabr deb koʻrsatgan).

20-oktabr kuni «Oʻzbekneftgaz» boshqaruvi raisi Abdugʻani Sanginov CNPC prezidenti Chjou Sinxuay boshchiligidagi delegatsiyani qabul qildi. Unda neft mahsulotlarini uzoq muddatli yetkazib berish imkoniyati, qoʻshma loyihalarni jadallashtirish va Toshkentda CNPCʼning doimiy vakolatxonasini ochish ehtimoli muhokama qilindi. Davlat kompaniyasi maʼlumotlariga koʻra, CNPC bilan hamkorlikning umumiy hajmi, jumladan, import shartnomalari, servis xizmatlari va qoʻshma loyihalar 1 mlrd dollardan oshgan.

Muzokaralar dizel yoqilgʻisi narxining oshishi fonida kechmoqda: Statistikalar.uz maʼlumotlariga koʻra, 2026-yil boshidan beri Toshkentda uning narxi 42,3% ga oshgan. 26-oktabr holatiga koʻra, poytaxtdagi AYoQShlarda bir litr dizel 15 mingdan 21 ming soʻmgacha sotilgan. Asosiy yetkazib beruvchi Rossiya boʻlib qolmoqda: 2025-yil oktabridan 2026-yil sentabriga qadar yengil neft mahsulotlari va benzin importidagi uning ulushi 75% ni tashkil etdi (Orion Markets baholashi).

Avvalroq «Oʻzbekneftgaz» neft bazalaridagi avtobenzin zaxiralari oʻtgan yilgiga nisbatan 2,5 baravar koʻp ekanini maʼlum qilgan edi. 2026-yilning yanvar — sentabr oylarida kompaniya 773,5 ming tonna benzin ishlab chiqardi.