Mirziyoyevga Baliqchida baliqchilik va limonchilik issiqxonalari loyihalari taqdim etildi

Andijon viloyatining Baliqchi tumani pilot maydon sifatida tanlandi. U yerda 24 ta meliorativ quduq yonida toʻliq siklli baliqchilik majmualarini joylashtirish rejalashtirilmoqda: chavoq va ozuqa yetkazib berishdan tortib, qayta ishlash, saqlash va sotishgacha. Har bir loyiha 50 sotixli maydonga moʻljallangan boʻlib, u yerda yiliga kamida 30 tonna gulmoyi (forel) yetishtirish va 10 ta ish oʻrni yaratish koʻzda tutilgan. Loyihalarni yagona baliqchilik xoldingi orqali boshqarish taklif etildi.

Soha oldiga intensiv texnologiyalar hisobiga baliq yetishtirish hajmini yiliga 1 million tonnaga yetkazish vazifasi qoʻyilgan. Tuman tajribasini boshqa hududlarga tatbiq etish uchun 2027-yil 1-martga qadar mamlakat boʻyicha 4 mingdan ortiq meliorativ quduqni xatlovdan oʻtkazish topshirildi. Baliq yetishtirishga yaroqli quduqlarni davlat-xususiy sheriklik shartlari asosida tadbirkorlar boshqaruviga berish rejalashtirilmoqda. Shuningdek, Xonobodda sovuq suv baliqlarini yetishtirish hamda Ulugʻnorda suv havzalarida baliqchilikni yoʻlga qoʻyish boʻyicha loyihalar ham taqdim etildi.

Shu tumanning oʻzida toʻqqizta mahalla atrofida 100 gektar maydonda limon yetishtirish uchun energiya tejamkor issiqxonalar barpo etish va ularni tadbirkorlarga tayyor holda topshirish, yetishtirish, saralash, qayta ishlash, qadoqlash, saqlash va sotish jarayonlarini esa yagona kooperatsiya zanjiriga birlashtirish koʻzda tutilgan. Dastlabki hisob-kitoblarga koʻra, 500 ta issiqxona kamida 1 ming nafar mahalliy aholini ish bilan taʼminlaydi; loyihaga ishsizlar va kam taʼminlangan oilalarni jalb qilish rejalashtirilmoqda. Kelgusi yili hududlarda yana 200 gektarda shunday majmualar qurish rejalashtirilgan boʻlib, bu 2 mingta oilaning daromadini oshirishi kutilmoqda.

Taqdimot yakunlari boʻyicha Mirziyoyev kambagʻallikni qisqartirishga qaratilgan ushbu loyihalarni moliyaviy qoʻllab-quvvatlash hamda aholini baliqchilik va limonchilikka oʻqitish xarajatlarini qoplash choralarini koʻrishni topshirdi.