Iqtisodiyot va moliya vazirligi qish uchun 350 kVt·soatlik elektr energiyasi meʼyori tanlanishini tushuntirdi

Matbuot anjumanida vazirlik vakili nima sababdan muhokamalar vaqtida taklif qilinganidek chegara 500 kVt·soat darajasida belgilanmaganiga oydinlik kiritdi. Mustafoyevning soʻzlariga koʻra, tahlillar gazlashtirilmagan hududlar aholisining 60 foizi qishda har oy 300 kVt·soatgacha elektr energiyasi sarflashini koʻrsatdi. Ikkinchi omil esa Ijtimoiy himoya milliy agentligi tomonidan kam taʼminlangan oilalarga 200 kVt·soatlik meʼyordan ortiqcha qoʻshimcha 150 kVt·soat uchun tariflardagi tafovut kompensatsiya qilib beriladigan amaldagi davlat qoʻllab-quvvatlovi tartibi boʻldi.

Hozirgi vaqtda mamlakatda 4 millionga yaqin xonadon quvur orqali keladigan gazga ulanmagan va suyultirilgan gazdan foydalanadi. Bundan tashqari, oshirilgan limit bosim pasayadigan yoki taʼminot uziladigan, gaz taʼminoti beqaror boʻlgan hududlardagi isteʼmolchilarga nisbatan ham qoʻllanilishi rejalashtirilmoqda. Oʻtgan qishdagi taʼminot tahlili maʼlumotlariga koʻra, bunday abonentlar soni ayrim kunlarda 607 mingtaga yetgan. Bunday xonadonlar roʻyxati “Oʻzenergoinspeksiya”, “Hududgaztaʼminot” va “Hududiy elektr tarmoqlari” takliflariga asosan viloyat hokimliklari tomonidan tasdiqlanadi.

Meʼyorni oshirish toʻgʻrisidagi hukumat qarori loyihasi Prezident maʼqullaganidan soʻng muhokama uchun eʼlon qilindi. Chegaraning gipotetik tarzda 500 kVt·soatgacha oshirilishi ehtimoliy byudjet xarajatlari boʻyicha hisob-kitoblar matbuot anjumanida keltirilmadi.