Mirziyoyevga Baliqchida baliqchilik va limon yetishtirish issiqxonalari loyihalari taqdim etildi

Rejalar Andijon viloyatining Baliqchi tumani misolida koʻrib chiqildi. U yerda 24 ta meliorativ quduq yaqinida toʻliq siklli baliqchilik majmualarini joylashtirish rejalashtirilmoqda: chavoqlar va ozuqa yetkazib berishdan tortib qayta ishlash, saqlash va sotishgacha. Har bir loyiha 50 sotixli yer maydoniga moʻljallangan; har biridan yiliga kamida 30 tonna gulmoyi (forel) olish koʻzda tutilgan, har birida 10 tadan ish oʻrni yaratiladi. Loyihalarni yagona baliqchilik xoldingi orqali boshqarish taklif etildi.

Soha oldiga intensiv texnologiyalar hisobiga baliq yetishtirish hajmini yiliga 1 million tonnaga yetkazish vazifasi qoʻyilgan. Tuman tajribasini boshqa hududlarga ham tatbiq etish maqsadida 2027-yil 1-martga qadar mamlakat boʻyicha 4 mingdan ortiq meliorativ quduqlarni xatlovdan oʻtkazish topshirildi. Baliq yetishtirishga yaroqli quduqlarni davlat-xususiy sheriklik shartlari asosida tadbirkorlar boshqaruviga berish rejalashtirilmoqda. Shuningdek, Xonobodda sovuq suvda yashovchi baliqlarni va Ulugʻnorda suv havzalarida baliq yetishtirish loyihalari taqdim etildi.

Shu tumanning oʻzida toʻqqizta mahalla yaqinida 100 gektar maydonda limon yetishtirish uchun energiya tejovchi issiqxonalar barpo etish va ularni tadbirkorlarga tayyor holda topshirish, yetishtirish, saralash, qayta ishlash, qadoqlash, saqlash va sotish jarayonlarini esa yagona kooperatsiya zanjiriga birlashtirish moʻljallanmoqda. Dastlabki hisob-kitoblarga koʻra, 500 ta issiqxona kamida 1 ming nafar mahalliy aholini ish bilan taʼminlaydi; loyihaga ishsizlar va kam taʼminlangan oilalarni jalb qilish rejalashtirilmoqda. Kelgusi yili hududlarda yana 200 gektar maydonda shunday majmualar qurish rejalashtirilgan boʻlib, bu 2 mingta oilaning daromadini oshirishi kutilmoqda.

Taqdimot yakunlari boʻyicha Mirziyoyev kambagʻallikni qisqartirishga qaratilgan ushbu taqdim etilgan loyihalarni moliyaviy qoʻllab-quvvatlash hamda aholini baliqchilik va limonchilikka oʻrgatish boʻyicha xarajatlarni qoplash choralarini koʻrishni topshirdi.