Oʻzbekistonda ikkinchi va uchinchi AES qurilishi rejalashtirilmoqda

Davlat rahbarining soʻzlariga koʻra, 17-oktabr kuni ikkinchi AES loyihasi boʻyicha yangi hamkorlar va investorlar bilan muzokaralar oʻtkazilishi rejalashtirilgan. Shavkat Mirziyoyev ushbu sohaga boʻlgan eʼtiborni uran qazib olishning sezilarli darajada oshishi, toʻplangan tajriba va sohaga kiritilgan yirik investitsiyalar bilan bogʻladi. Shu bilan birga, Prezident muzokaralar olib boriladigan potensial hamkorlarni, shuningdek, yangi obyektlarning qurilish maydonchalari, quvvatlari va muddatlarini ochiqlamadi.

Oʻzbekistondagi birinchi atom elektr stansiyasi Jizzax viloyatining Forish tumanida Rossiyaning «Rosatom» davlat korporatsiyasi bilan hamkorlikda qurilmoqda. Qiymati 9,5 milliard dollarlik loyiha VVER-1000 reaktorlariga ega ikkita katta quvvatli energoblok va RITM-200N reaktorlariga ega ikkita kichik blokni oʻzida birlashtiradi. Birinchi kichik reaktorni ishga tushirish 2029-yilga moʻljallangan boʻlib, obyektni 2034–2035-yillarda yakunlash rejalashtirilgan.

Prezident ikkinchi AES uchun maydoncha tayyorlanishi haqida ilk bor 17-avgust kuni Xorazm viloyatiga tashrifi chogʻida aytib oʻtgan edi. Keyinroq, sentabr oyida Serbiya prezidenti Aleksandr Vuchich Mirziyoyev bilan suhbatiga tayangan holda Oʻzbekiston ikkinchi stansiyani Xitoy bilan qurish niyatida ekanini maʼlum qildi, biroq respublikaning rasmiy idoralari Xitoy hamkori tanlanganini hozircha tasdiqlagani yoʻq.