OTB Oʻzbekistonga 60 ta elektr podstansiyasini modernizatsiya qilish uchun 200 million dollar ajratdi

Hujjat 15-oktabr kuni OTB prezidenti Masato Kanda hamda Oʻzbekiston Bosh vaziri oʻrinbosari, iqtisodiyot va moliya vaziri Jamshid Qoʻchqorov tomonidan imzolandi. Dastur ortib borayotgan isteʼmol sharoitida elektr energiyasi yoʻqotishlarini kamaytirish va energiya taʼminoti barqarorligini oshirishga qaratilgan.

Loyiha doirasida butun Oʻzbekiston boʻylab 60 ta asosiy taqsimlash podstansiyasini rekonstruksiya va modernizatsiya qilish, shuningdek, tarmoqlarni boshqarishning raqamli tizimlarini joriy etish rejalashtirilgan. "Oʻzbekiston milliy elektr tarmoqlari" AJ salohiyatini mustahkamlash, moliyaviy nazoratni takomillashtirish va xodimlarning malakasini oshirish boʻyicha choralar koʻzda tutilgan.

OTB hisob-kitoblariga koʻra, tashabbusning amalga oshirilishi transformatorlarning ortiqcha yuklanishini kamaytirish imkonini beradi, kamida 3,3 GVt qayta tiklanuvchi energiya quvvatlarini ulash uchun sharoit yaratadi va har yili atmosferaga chiqariladigan issiqxona gazlarini qariyb 23 ming tonna CO₂ ekvivalentiga qisqartiradi. Oktyabr oyi oxirida Jahon banki rahbariyati direktorlar kengashi muhokamasiga ushbu dastur uchun yana 100 million dollar ajratish masalasini kiritish niyatida.