OTB Qoraqalpogʻistonni rivojlantirishga 780 mln dollardan ortiq mablagʻ yoʻnaltirdi

Moliyalashtirish transport, suv infratuzilmasi, energetika va ijtimoiy sohani rivojlantirishni qamrab oladi, deb bildirdi OTBning Oʻzbekistondagi vakolatxonasi direktori Kanokpan Lao-Araya. Dastur doirasida bank va mintaqa rahbariyati "Iqtisodiy koridor" yondashuvi asosida ijtimoiy-iqtisodiy strategiyani muhokama qilish hamda yangilangan oʻzaro anglashuv memorandumini imzolash niyatida.

14–16-oktyabr kunlari boʻlib oʻtayotgan media-missiya davomida Qoraqalpogʻiston Respublikasi Joʻqorgʻi Kengesi raisi Amanbay Orinbayev bank delegatsiyasi bilan uchrashdi, deb xabar berdi OʻzA va Joʻqorgʻi Kengesi matbuot xizmati. Tomonlar A-380 trassasining 240 kilometrlik qismini rekonstruksiya qilish yakunlangani va foydalanishga topshirilganini qayd etdilar. Parlament matbuot xizmati aniqlik kiritishicha, hozirda yoʻlning yana 25 kilometrida sement-beton qoplamasini yotqizish ishlari olib borilmoqda, 92 kilometrida esa bunday ishlarni boshlash rejalashtirilgan.

Yoʻl qurilishidan tashqari, bank Gʻarbiy Oʻzbekistonning suv taʼminoti tizimini rivojlantirish uchun 145 million dollarlik kredit ajratdi, bu loyiha Qoraqalpogʻistonning 116 ta qishlogʻi va oltita tumanida, jumladan Amudaryo va Nukus tumanlaridagi obyektlarda qariyb 388 ming nafar aholini qamrab olishga moʻljallangan. Shuningdek, OTB quvvati 200 MVt boʻlgan hamda 100 MVt·soatlik akkumulyatorga ega "Nukus-2" shamol elektr stansiyasi loyihasida ishtirok etmoqda, uning ishga tushirilishi 2026-yilning toʻrtinchi choragida kutilmoqda.