Oʻzbekistonda “Samarqand noni” tovar belgisi sifatida roʻyxatdan oʻtkazildi

Vazirlik maʼlumotlariga koʻra, tovar belgisining davlat roʻyxatidan oʻtkazilganligi toʻgʻrisidagi guvohnoma “Tovar belgilari, xizmat koʻrsatish belgilari va tovar kelib chiqqan joy nomlari toʻgʻrisida”gi qonunga muvofiq 10 yil muddatga beriladi. Idorada taʼkidlanishicha, mazkur qadam milliy brendlarni huquqiy himoya qilish, ularning iqtisodiy salohiyatini oshirish va gastronomik merosni asrab-avaylashga qaratilgan.

Oldinroq, 2025-yilning fevral oyida Samarqand noni Oʻzbekistonning geografik koʻrsatkichlari davlat reyestriga kiritilgan edi. Oʻsha yilning 5-fevral kuni Adliya vazirligi rahbari Akbar Toshqulov tegishli hujjatni oʻsha paytda Samarqand viloyati hokimi vazifasini bajaruvchi boʻlgan Adiz Boboyevga topshirgandi.

“Geografik koʻrsatkichlar toʻgʻrisida”gi qonun mamlakatda 2022-yilning fevral oyidan buyon amal qilmoqda. Uning normalariga muvofiq, geografik koʻrsatkich mahsulotning xususiyatlari yoki sifatini u ishlab chiqarilgan hudud bilan bogʻlaydi, bu yerda ishlab chiqarishning kamida bitta asosiy bosqichi amalga oshirilishi shart.