OTB Qoraqalpogʻistonni rivojlantirishga 780 million dollardan ortiq mablagʻ yoʻnaltirdi

Moliyalashtirish transport, suv infratuzilmasi, energetika va ijtimoiy sohani rivojlantirishni qamrab oladi, dedi OTBning Oʻzbekistondagi vakolatxonasi direktori Kanokpan Lao-Araya. Dastur doirasida bank va hudud rahbariyati «Iqtisodiy koridor» yondashuvi asosida ijtimoiy-iqtisodiy strategiyani muhokama qilish hamda yangilangan oʻzaro anglashuv memorandumini imzolash niyatida.

14-16-oktabr kunlari boʻlib oʻtayotgan media-missiya davomida Qoraqalpogʻiston Respublikasi Joʻqorgʻi Kengesi raisi Amanbay Orinbayev bank delegatsiyasi bilan uchrashdi, deb xabar berdi OʻzA va Joʻqorgʻi Kenges matbuot xizmati. Tomonlar A-380 trassasining 240 kilometrlik qismida rekonstruksiya yakunlangani va foydalanishga topshirilganini qayd etdilar. Parlament matbuot xizmati aniqlik kiritishicha, ayni paytda yoʻlning yana 25 km qismiga sement-beton qoplama yotqizilmoqda, 92 km qismida esa bunday ishlarni boshlash rejalashtirilmoqda.

Yoʻl qurilishidan tashqari, bank Gʻarbiy Oʻzbekiston suv taʼminoti tizimini rivojlantirish uchun 145 million dollarlik kredit ajratdi, bu Qoraqalpogʻistonning 116 ta qishlogʻi va oltita tumanidagi, jumladan Amudaryo va Nukus tumanlaridagi obyektlarni qamrab olgan holda qariyb 388 ming nafar aholiga xizmat koʻrsatishga moʻljallangan. Shuningdek, OTB quvvati 200 MVt boʻlgan va 100 MVt·soatlik akkumulyatorga ega «Nukus-2» shamol elektr stansiyasi loyihasida ham ishtirok etmoqda, uni ishga tushirish 2026-yilning toʻrtinchi choragida kutilmoqda.