OTB Qoraqalpogʻistonni rivojlantirish uchun 780 mln dollardan ortiq mablagʻ yoʻnaltirdi

Moliyalashtirish transport, suv infratuzilmasi, energetika va ijtimoiy sohani rivojlantirishni qamrab oladi, dedi OTBning Oʻzbekistondagi vakolatxonasi direktori Kanokpan Lao-Araya. Dastur doirasida bank va mintaqa rahbariyati «Iqtisodiy koridor» yondashuvi asosidagi ijtimoiy-iqtisodiy strategiyani muhokama qilishni hamda yangilangan oʻzaro anglashuv memorandumini imzolashni rejalashtirmoqda.

14-16-oktabr kunlari oʻtkazilayotgan media-missiya davomida Qoraqalpogʻiston Respublikasi Joʻqorgʻi Kengesi raisi Amanbay Orinbayev bank delegatsiyasi bilan uchrashdi, deb xabar berdi OʻzA va Joʻqorgʻi Kengesi matbuot xizmati. Tomonlar A-380 trassasining 240 kilometrlik qismini rekonstruksiya qilish yakunlangani va foydalanishga topshirilganini qayd etdilar. Parlament matbuot xizmati aniqlik kiritishicha, hozirda yoʻlning yana 25 kilometriga sement-beton qoplama yotqizilmoqda, 92 kilometrida esa bunday ishlarni boshlash rejalashtirilgan.

Yoʻl qurilishidan tashqari, bank Gʻarbiy Oʻzbekiston suv taʼminoti tizimini rivojlantirish uchun 145 mln dollar miqdorida kredit ajratdi, bu Qoraqalpogʻistonning oltita tumani va 116 ta qishlogʻidagi qariyb 388 ming aholini, jumladan Amudaryo va Nukus tumanlaridagi obyektlarni qamrab olishga qaratilgan. Shuningdek, OTB quvvati 200 MVt boʻlgan va 100 MVt·soatlik akkumulyatorga ega «Nukus-2» shamol elektr stansiyasi loyihasida ishtirok etmoqda, uning ishga tushirilishi 2026-yilning toʻrtinchi choragida kutilmoqda.