OTB Qoraqalpogʻistonni rivojlantirish uchun 780 million dollardan ortiq mablagʻ yoʻnaltirdi

Moliyalashtirish transport, suv infratuzilmasi, energetika va ijtimoiy sohani rivojlantirishni qamrab oladi, deb maʼlum qildi OTBning Oʻzbekistondagi vakolatxonasi direktori Kanokpan Lao-Araya. Dastur doirasida bank va hudud rahbariyati «Iqtisodiy koridor» yondashuvi asosida ijtimoiy-iqtisodiy strategiyani muhokama qilish hamda yangilangan oʻzaro anglashuv memorandumini imzolash niyatida.

14–16-oktabr kunlari oʻtkazilayotgan mediamissiya davomida Qoraqalpogʻiston Respublikasi Joʻqorgʻi Kengesi raisi Amanbay Orinbayev bank delegatsiyasi bilan uchrashdi, deb xabar berdi OʻzA va Joʻqorgʻi Kenges matbuot xizmati. Tomonlar A-380 trassasining 240 kilometrlik qismida rekonstruksiya yakunlangani va foydalanishga topshirilganini qayd etishdi. Parlament matbuot xizmatining aniqlik kiritishicha, hozirda yoʻlning yana 25 kilometrida sement-beton qoplama yotqizilmoqda, 92 kilometrida esa bunday ishlarni boshlash rejalashtirilgan.

Yoʻl qurilishidan tashqari, bank Gʻarbiy Oʻzbekistonning suv taʼminoti tizimini rivojlantirish uchun 145 million dollar miqdorida kredit ajratdi, bu Qoraqalpogʻistonning 116 ta qishlogʻi va oltita tumanidagi, jumladan Amudaryo va Nukus tumanlaridagi obyektlarni qamrab olgan holda qariyb 388 ming nafar aholini taʼminlashi koʻzda tutilgan. Shuningdek, OTB quvvati 200 MVt boʻlgan va 100 MVt·soatlik akkumulyatorga ega «Nukus-2» shamol elektr stansiyasi loyihasida ishtirok etmoqda, uni ishga tushirish 2026-yilning toʻrtinchi choragida kutilmoqda.