Yangi Toshkentda 1 mlrd dollarlik obyektlar topshirildi va yana 2,5 mlrd dollarlik qurilish boshlandi

Foydalanishga topshirilgan obyektlar orasida qariyb 7000 xonadonga moʻljallangan «Sharq bahori» turar-joy majmuasining birinchi navbati, 2000 oʻrinli maktab, Savdo-sanoat palatasi binosi, «Sohil bogʻi» parki, 18 km avtomobil yoʻllari, 13 km kanalizatsiya tarmoqlari va 4,5 km suv quvuri bor. Shuningdek, Xitoyning Haocheng Industry Group Limited kompaniyasi bilan hamkorlikda qurilgan, qiymati 95 million dollar boʻlgan yuqori kuchlanishli tarmoqlarga ega elektr podstansiyasi hamda Turkiyaning MIMSAN kompaniyasi ishtirokida barpo etilgan, 100 ming xonadonni taʼminlashga moʻljallangan 73 million dollarlik trigeneratsiya stansiyasi ishga tushirildi.

Yangi bosqich doirasida birlamchi investitsiyalari 320 million dollar boʻlgan yarimoʻtkazgichlar va yuqori texnologiyali mahsulotlar ishlab chiqarishga moʻljallangan Deep Tech Park sanoat zonasi, maydoni 818 ming kvadrat metrdan ortiq boʻlgan Metropolis ishbilarmonlik majmuasi, 120 oʻrinli shifoxona, shuningdek, Silk City, «Mavj» va «Marjon» turar-joy majmualari qurilishiga start berildi. Finlandiyaning MariMatic kompaniyasi bilan chiqindilarni elektr energiyasiga qayta ishlash loyihasi rejalashtirilgan, koʻp qavatli uylarning tomlarida esa 20 megavattlik fotoelektr tizimlarini oʻrnatish koʻzda tutilgan.

Poytaxt bilan transport aloqasi uchun Temur Malik koʻchasi va 4R12 trassasi oʻrtasida koʻprik va yoʻl oʻtkazgichga ega 10 kilometrlik yoʻl, shuningdek, metropoliten bekatlari bilan bogʻlangan yerosti avtoturargohi qurilishi rejalashtirilgan. Matbuot xizmati maʼlumotlariga koʻra, oʻtgan uch yil davomida shaharda 2 milliard dollarlik ishlar bajarilgan.