Yangi Toshkentda 1 mlrd dollarlik obyektlar foydalanishga topshirildi va yana 2,5 mlrd dollarlik qurilish boshlandi

Foydalanishga topshirilgan obyektlar qatorida 7000 ga yaqin xonadonga moʻljallangan «Sharq bahori» turar joy majmuasining birinchi bosqichi, 2000 oʻrinli maktab, Savdo-sanoat palatasi binosi, «Sohil bogʻi» parki, 18 km avtomobil yoʻllari, 13 km kanalizatsiya tarmoqlari va 4,5 km suv quvuri bor. Shuningdek, Xitoyning Haocheng Industry Group Limited kompaniyasi bilan birgalikda qurilgan qiymati 95 million dollarlik yuqori kuchlanishli tarmoqlarga ega elektr podstansiyasi hamda Turkiyaning MIMSAN kompaniyasi ishtirokida barpo etilgan, 100 ming xonadonni taʼminlashga moʻljallangan 73 million dollarlik trigeneratsiya stansiyasi ishga tushirildi.

Yangi bosqich doirasida yarimoʻtkazgichlar va yuqori texnologiyali mahsulotlar ishlab chiqarishga moʻljallangan, dastlabki investitsiyalari 320 million dollar boʻlgan Deep Tech Park sanoat zonasi, maydoni 818 ming kvadrat metrdan ortiq Metropolis biznes majmuasi, 120 oʻrinli shifoxona, shuningdek, Silk City, «Mavj» va «Marjon» turar joy majmualari qurilishiga start berildi. Finlandiyaning MariMatic kompaniyasi bilan chiqindilarni elektr energiyasiga qayta ishlash loyihasi rejalashtirilgan, koʻp kvartirali uylarning tomlariga esa 20 megavattlik fotoelektr tizimlarini oʻrnatish koʻzda tutilgan.

Poytaxt bilan transport aloqasini taʼminlash uchun Temur Malik koʻchasi va 4R12 trassasi oʻrtasida koʻprik va yoʻl oʻtkazgichga ega 10 kilometrlik yoʻl, shuningdek, metropoliten bekatlari bilan bogʻlangan yerosti avtoturargohi qurilishi rejalashtirilgan. Matbuot xizmati maʼlumotlariga koʻra, oʻtgan uch yil davomida shaharda 2 milliard dollarlik ishlar bajarilgan.