Yangi Toshkentda 1 mlrd dollarlik obektlar topshirildi va yana 2,5 mlrd dollarlik qurilish boshlandi

Foydalanishga topshirilgan obektlar qatorida 7000 ga yaqin xonadonga moʻljallangan "Sharq bahori" turar-joy majmuasining birinchi navbati, 2000 oʻrinli maktab, Savdo-sanoat palatasi binosi, "Sohil bogʻi" parki, 18 km avtomobil yoʻli, 13 km kanalizatsiya tarmogʻi va 4,5 km suv quvuri bor. Shuningdek, Xitoyning Haocheng Industry Group Limited kompaniyasi bilan hamkorlikda qurilgan, qiymati 95 million dollar boʻlgan yuqori kuchlanishli elektr uzatish liniyalariga ega podstansiya hamda Turkiyaning MIMSAN kompaniyasi ishtirokida 73 million dollarga barpo etilgan, 100 ming xonadonni taʼminlashga moʻljallangan trigeneratsiya stansiyasi ishga tushirildi.

Yangi bosqich doirasida yarimoʻtkazgichlar va yuqori texnologiyali mahsulotlar ishlab chiqarishga moʻljallangan, dastlabki investitsiyalari 320 million dollar boʻlgan Deep Tech Park sanoat zonasi, maydoni 818 ming kvadrat metrdan ortiq Metropolis ishbilarmonlik majmuasi, 120 oʻrinli shifoxona, shuningdek, Silk City, "Mavj" va "Marjon" turar-joy majmualari qurilishiga start berildi. Finlandiyaning MariMatic kompaniyasi bilan chiqindilarni elektr energiyasiga qayta ishlash loyihasi rejalashtirilgan, koʻp qavatli uylarning tomlarida esa 20 megavatt quvvatga ega fotoelektr tizimlarini oʻrnatish koʻzda tutilgan.

Poytaxt bilan transport aloqasini taʼminlash uchun Temur Malik koʻchasi bilan 4R12 trassasi oʻrtasida koʻprik va yoʻl oʻtkazgichga ega 10 kilometrlik yoʻl, shuningdek, metropoliten bekatlari bilan bogʻlangan yerosti avtoturargohi qurilishi rejalashtirilgan. Matbuot xizmati maʼlumotlariga koʻra, oʻtgan uch yil davomida shaharda 2 milliard dollarlik ishlar amalga oshirilgan.