Jahon banki Oʻzbekistonning 2026-yilgi YaIM oʻsishi prognozini 7,9 foizgacha oshirdi

Aprel oyidagi baholashga nisbatan koʻrsatkich 1,5 foiz bandga oshirildi. 2027-yil uchun prognoz ham koʻtarildi — 6,7 foizdan 7,5 foizgacha, 2028-yilda esa Jahon banki respublika YaIMining 7,1 foiz darajasida oʻsishini kutmoqda. Yevropa va Markaziy Osiyoning rivojlanayotgan davlatlari orasida 2026-yilda bundan yuqori surʼat faqat Qirgʻizistonda (9,6 foiz) prognoz qilinmoqda, 2027-yilda esa Oʻzbekiston birinchi oʻrinni egallashi mumkin.

Ekspertlar iqtisodiy oʻsishni barqaror ichki talab, real ish haqining oshishi, bandlikning oʻsishi, pul oʻtkazmalari hajmi, shuningdek, infratuzilma, energetika va uy-joy sektoriga kiritilgan investitsiyalar bilan bogʻlamoqda. Oʻzbekistonning byudjet taqchilligi 2026-yilda YaIMning 2,2 foizi darajasida boʻlishi kutilmoqda.

Hisobotning alohida bloki texnologiyalar taʼsiriga bagʻishlangan. Tashkilot maʼlumotlariga koʻra, Oʻzbekistonda ish joylarida sunʼiy intellektdan mutaxassislarning 48 foizi, rahbarlarning 43 foizi va ofis xodimlarining 27 foizi foydalanadi. Shu bilan birga, soʻralgan ishlayotgan fuqarolarning qariyb 39 foizi begona yordamisiz fayllarni koʻchirish yoki nusxalash kabi asosiy operatsiyalarda qiyinchiliklarga duch kelishini bildirgan.