Markaziy bank 2026-yilning ikkinchi choragi boʻyicha uy-joy bozori sharhini eʼlon qildi

Regulyator maʼlumotlariga koʻra, aprel—iyun oylarida bitimlar soni oʻtgan yilning mos davriga nisbatan 0,1% ga oshdi. Bundan oldin birinchi chorakda faollikning keskin oʻsishi kuzatilgan boʻlib, oʻshanda 110 mingga yaqin shartnoma tuzilgan edi: xaridorlarning bir qismi xaridlarni eskrou tizimi joriy etilishidan oldin rasmiylashtirishga harakat qildi. Hududlar kesimida bitimlar sonining eng katta oʻsishi Xorazm viloyatida qayd etildi — 17,8% ga, Navoiy va Sirdaryo viloyatlarida koʻrsatkich qariyb 7,5% ga, Qoraqalpogʻistonda — 6,1% ga, Toshkent shahrida esa — 2% ga oshdi.

Markaziy bank talabni qoʻllab-quvvatlovchi asosiy omillardan biri sifatida ipotekani keltirdi: chorak davomida banklar 7,4 trln soʻmlik uy-joy kreditlari ajratdi, bu oʻtgan yilning mos davridagi koʻrsatkichdan 48% ga koʻpdir. Butun birinchi yarim yillik davomida ipoteka kreditlash hajmi 13,1 trln soʻmga yetdi (38% lik oʻsish).

2026-yil iyun oyida birlamchi bozordagi xonadonlar oʻtgan yilning iyuniga nisbatan soʻmda 6,2% ga, dollarda esa 12% ga qimmatlashdi. Ikkilamchi bozorda yillik oʻsish soʻmda 6,3% ni, dollarda esa 12,2% ni tashkil etdi. Markaziy bank Toshkentdan tashqarida narxlar poytaxtdagiga qaraganda tezroq oshganini, bu esa boshlangʻich bazaning pastligi va investitsiyalar kengayishi bilan bogʻliqligini qayd etdi. Shu bilan birga, Toshkentda yerning bir sotigʻining oʻrtacha taklif narxi iyun oyida 292 mln soʻmgacha — yillik hisobda 9% ga pasaydi.