Markaziy bank 2026-yil ikkinchi choragi uchun uy-joy bozori sharhini e’lon qildi

Regulyator ma’lumotlariga koʻra, aprel—iyun oylarida bitimlar soni oʻtgan yilning mos davriga nisbatan 0,1% ga oshgan. Bundan oldin birinchi chorakda faollikning keskin oʻsishi kuzatilib, qariyb 110 mingta shartnoma tuzilgan edi: xaridorlarning bir qismi bitimlarni eskrou tizimi joriy etilishidan oldin rasmiylashtirishga intilgan. Hududlar kesimida bitimlar sonining eng yuqori oʻsishi Xorazm viloyatida qayd etildi — 17,8% ga, Navoiy va Sirdaryo viloyatlarida bu koʻrsatkich qariyb 7,5% ga, Qoraqalpogʻistonda — 6,1% ga, Toshkent shahrida esa 2% ga oshgan.

Markaziy bank talabni qoʻllab-quvvatlovchi asosiy omillardan biri sifatida ipotekani keltirdi: chorak davomida banklar 7,4 trln soʻmlik uy-joy kreditlari ajratgan, bu bir yil oldingi natijadan 48% ga koʻpdir. Butun birinchi yarim yillikda ipoteka kreditlash hajmi 13,1 trln soʻmga yetdi (oʻsish 38%).

2026-yilning iyun oyida birlamchi bozordagi xonadonlar oʻtgan yilning iyuniga nisbatan soʻmda 6,2% ga, dollarda esa 12% ga qimmatlashdi. Ikkilamchi bozorda yillik oʻsish soʻmda 6,3% ni, dollarda esa 12,2% ni tashkil etdi. Markaziy bank Toshkentdan tashqarida narxlar poytaxtdagiga qaraganda tezroq oʻsganini qayd etdi, bu pastroq boshlangʻich baza va investitsiyalarning kengayishi bilan izohlanadi. Shu bilan birga, Toshkentda bir sotix yerning oʻrtacha taklif narxi iyun oyida 292 mln soʻmgacha — yillik hisobda 9% ga pasaygan.