Oʻzbekistonda maʼmuriy sudlarning vakolatlarini kengaytirish taklif etildi

Taqdim etilgan tashabbuslarga koʻra, amaldagi bitta daʼvo arizasi turi oʻrniga toʻrtta turdagi daʼvo arizasini joriy etish, shuningdek, arizalarni berish uchun belgilangan olti oylik muddatni qayta koʻrib chiqish rejalashtirilmoqda. Fuqarolarga davlat organi tomonidan qonunchilik buzilganini tan olish toʻgʻrisida vaqt cheklovisiz daʼvo arizasi bilan murojaat qilish imkoniyatini berish taklif qilinmoqda.

Bundan tashqari, fuqarolarga mahalliy davlat hokimiyati organlarining ularning huquqlarini buzuvchi hujjatlari ustidan toʻgʻridan toʻgʻri sudga shikoyat qilishlariga ruxsat berish koʻzda tutilmoqda. Shuningdek, maʼmuriy sudlarga biznes va fuqarolarga nisbatan taʼsir choralarini qoʻllashda mansabdor shaxslar tomonidan diskretsion vakolatlarning qonuniy va asosli qoʻllanilganini tekshirish huquqini berish taklif etilmoqda.

Sud qarorlarining ijrosi boʻyicha quyidagi chora nazarda tutilgan: agar mansabdor shaxs jarima qoʻllanilganidan keyin ham hukmni yana bajarmasa, sud prokurorga bildirishnoma yuboradi. Davlat rahbari taqdim etilgan tashabbuslarni qoʻllab-quvvatladi.

Hisobot maʼlumotlariga koʻra, 2017-yil 1-iyuldan boshlab mamlakat maʼmuriy sudlari 150 mingga yaqin ishni koʻrib chiqqan, davlat organlarining 70 mingdan ortiq qarorini bekor qilgan va 27 mingga yaqin xususiy ajrim chiqargan.