Toshkent YHXB bloger MrBeast avtomobili ishtirokida YTH sodir boʻlgani haqidagi xabarlarni rad etdi

Poytaxt YHXB axborot xizmati maʼlumotlariga koʻra, blogerning mashinasi uning Toshkentga tashrifi davomida yoʻl-transport hodisalariga uchramagan. Boshqarma sportkar shahar boʻylab harakatlanish vaqtida doimiy nazoratda boʻlganini taʼkidlab, foydalanuvchilarni tekshirilmagan maʼlumotlarni tarqatmaslikka chaqirdi.

Ijtimoiy tarmoqlardagi xabarlarga qizil rangli avtomobil kuzovidagi koʻzga tashlanadigan tirnalishlar va boʻyoq qoplamasining shikastlanishlari sabab boʻlgan. Blogerning oʻzi transport vositasi mazkur shikastlanishlarni avvalroq Hindistonning Dehli shahrida olganini tushuntirdi.

MrBeast Toshkentga chellenjlar oʻtkazish va 9-oktabrga rejalashtirilgan muxlislar bilan uchrashuv uchun kelgan. Avvalroq u poytaxtda tashkil etgan oʻyinlarning uch nafar ishtirokchisi 100 million soʻmdan yutib olgan edi.