Toshkent viloyatida 586 tup daraxt va buta tag-tugi bilan qoʻporib tashlandi

Qoidabuzarlik holati Toshkent viloyati Ekologiya va iqlim oʻzgarishi bosh boshqarmasi hamda tuman Ekopoliya boʻlimi xodimlari tomonidan ijtimoiy tarmoqlardagi xabarlardan soʻng "Gʻazalkent" mahallasida aniqlandi. Ekologlarning maʼlumotlariga koʻra, "Y. D." kompaniyasi 571 tup uchqat butasi, toʻqqiz tup qimmatbaho doʻlana daraxti, uch tup archa daraxti va uch tup kam qimmatli olcha daraxtini ildizi bilan qoʻporib tashlagan.

Idoraning maʼlum qilishicha, tadbirkorga bir necha bor ogohlantirishlar yuborilgan, biroq u talablarni eʼtiborsiz qoldirib, qarshilik koʻrsatishga uringan. Ekopoliya qonunbuzarlikni toʻxtatdi, oʻsimlik qoldiqlari esa maxsus texnika yordamida olib chiqib ketildi.

Mutaxassislar atrof-muhitga yetkazilgan zararni 1 milliard 705 million 660 ming soʻmga baholadi. Toʻplangan materiallar holatga huquqiy baho berish va chora koʻrish uchun huquqni muhofaza qiluvchi organlarga yuboriladi.