Oʻzgidromet Oʻzbekistonda havo harorati +25 darajagacha koʻtarilishini prognoz qildi

5-oktabr kuni kunduzi respublika boʻyicha quruq ob-havo saqlanib qoladi, harorat asosan +15…+20 daraja boʻladi, yogʻingarchilik faqat Fargʻona vodiysi viloyatlarida boʻlishi mumkin, bu hududlarda shamol tezligi 13–18 m/s gacha kuchayishi ehtimoli bor. Togʻoldi va togʻli hududlarda 5-oktabr kuni sinoptiklar yomgʻir yogʻishini, baland togʻlarda esa qorga aylanishini kutmoqda, shuningdek, sel va toshqin xavfidan ogohlantirmoqda.

6-oktabrdan 9-oktabrgacha boʻlgan davrda mamlakatning asosiy hududida yogʻingarchilik kutilmaydi. 6-oktabrga oʻtar kechasi harorat +5…+10, shimolda +2 dan +7 darajagacha boʻladi, kunduzi esa +15…+20 darajagacha isiydi. Keyingi kunlarda, 7–9-oktabrda, termometr ustunlari kechasi +10…+15, kunduzi esa +20…+25 darajagacha koʻtariladi. Ushbu kunlarda biroz yomgʻir faqat 8–9-oktabr kunlari Fargʻona viloyatining togʻlarida yogʻishi mumkin. Sharqiy shamol tezligi 7–12 m/s ni tashkil etadi.

Toshkentda butun hafta davomida yomgʻir yogʻishi prognoz qilinmayapti. Kunduzgi harorat 5–6-oktabrda +17…+20 daraja atrofida boʻladi, shundan soʻng 7–9-oktabrda +22…+25 darajagacha koʻtariladi. Poytaxtda 6–7-oktabrga oʻtar kechasi harorat +7…+10, 8–9-oktabrda esa +12 dan +15 darajagacha boʻlishi kutilmoqda.