BMTTR: koʻp oʻlchovli qashshoqlik sharoitidagi odamlar soni 1,2 mlrd nafarga yetdi

Mazkur koʻrsatkich indeksning oldingi yangilanishiga nisbatan 51,5 mln kishiga oshdi. Bu 2010-yilda Global koʻp oʻlchovli qashshoqlik indeksi (MPI) ishga tushirilganidan buyon ushbu qiymatning ilk marta oʻsishidir. 2026-yilgi hisobot dunyo aholisining 78 foizi istiqomat qiladigan 108 ta rivojlanayotgan mamlakatni qamrab olgan.

Koʻp oʻlchovli qashshoqlik sharoitidagi odamlarning yarmidan koʻpini — 617 mln kishini — bolalar tashkil etadi, qashshoq aholining 83 foizi esa qishloq joylarda yashaydi. Agar inson taʼlim, sogʻliqni saqlash va turmush darajasi sohasidagi oʻnta koʻrsatkichning kamida uchdan bir qismidan mahrum boʻlsa, u bunday sharoitda yashayotgan deb tan olinadi.

Umumiy oʻsishning bir qismi demografiya bilan bogʻliq: yangi tekshiruvlar oʻtkazilmagan 95 ta davlatda aholi sonining qayta hisoblab chiqilishi koʻrsatkichga 15,8 mln kishini qoʻshdi. 2026-yilda maʼlumotlari yangilangan 13 ta davlat orasida ham qashshoqlik darajasini, ham qashshoqlarning mutlaq sonini beshta mamlakat, jumladan Tojikiston, Misr va Nepal qisqartirishga muvaffaq boʻldi. Angola va Zambiyada qashshoqlar ulushi kamaydi, biroq aholining umumiy oʻsishi ularning sonining ortishiga olib keldi, Nigeriyada esa 2010-yillardagi muvaffaqiyatlardan soʻng vaziyat yana yomonlashdi.