Oʻzbekiston TIV Ar-Riyod aeroportiga uyushtirilgan hujumni qoraladi

Saudiya Arabistoni Fuqaro aviatsiyasi boshqarmasi maʼlumotlariga koʻra, 10-oktabr kungi hujum oqibatida 12 kishi halok boʻlgan, yana 309 kishi jarohatlangan. Zarba qurbonlari toʻrt nafar Saudiya Arabistoni fuqarosi, ikki nafar Bangladesh fuqarosi, shuningdek, AQSH, Misr, Iordaniya, Suriya, Falastin va Sudan fuqarolari boʻldi. Poytaxt aeroporti faoliyati vaqtincha toʻxtatildi, reyslar esa zaxira aerodromlariga yoʻnaltirildi.

Oʻzbekiston TIV halok boʻlganlarning yaqinlariga hamdardlik bildirdi hamda Saudiya Arabistonining suvereniteti va xavfsizligini qoʻllab-quvvatlashini maʼlum qildi. Mahkama fuqarolik infratuzilmasiga berilgan zarbalarni xalqaro huquqning jiddiy buzilishi deb atadi hamda barcha tomonlarni bosiqlik koʻrsatishga va mojarolarni diplomatik yoʻl bilan hal etishga chaqirdi.

"Uzbekistan Airways" milliy aviatashuvchisi Toshkent — Jidda va Toshkent — Madina yoʻnalishlari boʻyicha parvozlarni tasdiqlangan jadval asosida shtat rejimida amalga oshirishda davom etayotganini maʼlum qildi. Avvalroq Oʻzbekistonning Saudiya Arabistonidagi elchixonasi vatandoshlarni aviareyslarning ehtimoliy kechikishlarini hisobga olishga va Yaman bilan chegaradosh hududlarga borishdan tiyilishga chaqirgan edi.