2026-yilgi Tinchlik boʻyicha Nobel mukofoti Navi Pillayga berildi

Mukofot tinchlik va xalqaro huquqni ilgari surishdagi saʼy-harakatlari uchun berildi. Nobel qoʻmitasi Pillay qurolli mojarolar soni ortib borayotgan bir sharoitda xalqaro huquqiy institutlarni mustahkamlashga, shuningdek, harbiy jinoyatlar, genotsid va insoniyatga qarshi jinoyatlar uchun sud taʼqibini rivojlantirishga hal qiluvchi hissa qoʻshganini taʼkidladi.

Pillay 2008-yildan 2014-yilgacha BMTning Inson huquqlari boʻyicha Oliy komissari lavozimida ishlagan. Bungacha u Janubiy Afrika Oliy sudi, Ruanda boʻyicha Xalqaro jinoiy tribunal va Xalqaro jinoiy sud sudyasi boʻlib faoliyat yuritgan. Huquqshunos 2021-yildan 2025-yilgacha BMTning bosib olingan Falastin hududlaridagi voqealarni tekshirish boʻyicha Mustaqil xalqaro komissiyasiga rahbarlik qilgan, shuningdek, Myanmadagi rohingyalar genotsidi boʻyicha sudda BMT Xalqaro sudining ad hoc sudyasi sifatida ishtirok etmoqda.

2026-yilda tinchlik mukofotiga 287 nafar nomzod, jumladan 208 nafar jismoniy shaxs va 79 ta tashkilot daʼvogarlik qildi. Pul mukofotining miqdori 12 million Shvetsiya kronasini tashkil etadi, taqdirlash marosimi 10-dekabr kuni Osloda boʻlib oʻtadi.