Tailandda samolyotda mamlakatdan chiqish uchun yigʻim joriy etish taklif qilindi

Toʻlov miqdori dastlabki bosqichda 1000 batni (taxminan 30 AQSh dollari) tashkil etadi va keyinchalik 5000 batgacha oshirilishi mumkin. Talabni barcha uchib ketayotgan yoʻlovchilarga, jumladan xorijiy sayyohlarga ham tatbiq etish rejalashtirilmoqda. Qirollikni dengiz yoki quruqlik yoʻli bilan tark etayotgan sayohatchilarga ushbu chora hozircha taalluqli boʻlmaydi.

Yigʻimni chiqib ketishdan oldin toʻlash lozim. Aviatashuvchilar yoki chipta agentlari ushbu summani toʻgʻridan-toʻgʻri aviachiptalar narxiga kiritishi koʻzda tutilgan. Toʻlanmagan taqdirda yigʻim miqdorining ikki baravari miqdorida jarima, shuningdek, kechiktirilgan har bir oy uchun 1,5 foiz miqdorida penya nazarda tutilgan. Shu bilan birga, norma ikki yoshgacha boʻlgan bolalar, qirollik oilasi aʼzolari, xorijiy davlatlar rahbarlari, rasmiy delegatsiyalar, havo kemalari ekipajlari hamda aeroportlarning tranzit hududlarini tark etmaydigan tranzit yoʻlovchilarga taalluqli boʻlmaydi.

Tailand Moliya vazirligi bayonotiga koʻra, loyiha davlat resurslaridan foydalanishni optimallashtirish va favqulodda vaziyatlarga munosabat bildirish moslashuvchanligini oshirishga qaratilgan. Tashabbusning jamoatchilik muhokamasi 30-sentabrda boshlandi va 29-oktabrgacha davom etadi. Qabul qilingan taqdirda, qonun rasmiy hukumat xabarnomasida eʼlon qilinganidan 180 kun oʻtgach kuchga kiradi.