Togʻ-kon sanoati va geologiya vazirligi Cengiz Holding bilan ikki viloyatda koʻmir qidiruvini muhokama qildi

Uchrashuv 23-oktabr kuni boʻlib oʻtdi. Unda vazirlik nomidan vazirning birinchi oʻrinbosari Feruza Hamidova ishtirok etdi. Turkiya tomonidan “CENERGO” MChJ rahbari va holdingning Oʻzbekistondagi mintaqaviy rahbari Janer Karabay qatnashdi.

Koʻmir konlaridan tashqari, tomonlar mamlakatdagi istiqbolli maydonlarni geologik oʻrganish va ularni kelgusida oʻzlashtirishga tayyorlash masalalarini muhokama qildilar. Shuningdek, mineral-xomashyo sohasidagi ehtimoliy yangi investitsiya loyihalari koʻrib chiqildi. Uchrashuv yakunlari boʻyicha biron-bir hujjat imzolangani haqida xabar berilmadi.

Vazirlik maʼlumotlariga koʻra, kompaniya vakillariga sohaning meʼyoriy bazasi, jumladan, yangi tahrirdagi “Yer osti boyliklari toʻgʻrisida”gi qonun qoidalari hamda uning tadbirkorlar va investorlar oldiga qoʻyadigan talablari haqida maʼlumot berildi. Yer qaʼri uchastkasidan foydalanish huquqini E-auksion elektron platformasi orqali olish tartibi alohida koʻrib chiqildi: vazirlikda tushuntirilishicha, bunday huquqlar elektron auksionlarda taqsimlanadi.