Raqobat qoʻmitasi dorilarning ulgurji xaridi shartlari boʻyicha shikoyatlarni oʻrganmoqda

Bunday amaliyot yuzasidan shikoyatlar ijtimoiy tarmoqlarda paydo boʻlgan edi. Agar qoʻmita buni qoidabuzarlik deb topsa, kompaniyalarga qoidabuzarlik sodir etilgan butun davr uchun (bunda oxirgi uch yildan koʻp boʻlmagan vaqt hisobga olinadi) tovarlarni sotishdan tushgan tushumning 5 foizi miqdorida jarima solinishi mumkin. Shikoyat qilingan kompaniyalar nomlarini idora hozircha oshkor qilmadi, tekshiruv natijalari haqida ham hali xabar berilmadi.

"Raqobat toʻgʻrisida"gi qonunning 18-moddasiga muvofiq, ustun muzokara kuchini suiisteʼmol qilish, xususan, shartnoma tuzishda qoʻshimcha shartlarni — masalan, boshqa tovarni sotib olish majburiyatini yuklash hisoblanadi. Qoʻmitaning hisoblashicha, bunday talablar kichik biznes faoliyatini cheklashi va raqobatga zarar yetkazishi mumkin. Idora bahosiga koʻra, bu kabi amaliyot kichik dorixonalarni xarid qilishni rejalashtirmagan preparatlariga pul sarflashga majbur qilishi mumkin.

Qoʻmita maʼlumotlariga koʻra, 2026-yilning yanvar—sentabr oylarida mamlakatga 305 ta korxona dori vositalarini olib kirgan boʻlib, butun importning 47,2 foizi ularning beshtasi hissasiga toʻgʻri kelgan. 1-oktabr holatiga koʻra, Oʻzbekistonda 14 598 ta dorixona faoliyat yuritgan, shulardan 14 149 tasi chakana va 449 tasi ulgurji dorixonadir. 2023-yilga nisbatan asosiy chakana dorixonalar soni kamaygan — 8584 taga nisbatan 7940 ta, filiallar esa koʻpaygan — 4639 taga nisbatan 6209 ta. 2023-yilda ulgurji dorixonalar soni 521 ta boʻlgan.