Paramount Warner Bros. Discovery kompaniyasini 110 milliard dollarga sotib olishni yakunladi

Birlashuvdan soʻng yangi kompaniyaning aksiyalari Nyu-York fond birjasida SKYD tikeri ostida savdo qilina boshladi. Birlashgan tuzilma rahbarlari Paramount bosh direktori Devid Ellison va Mattel sobiq rahbari Inon Kreyz boʻldi, Warner Bros. Discovery sobiq rahbari Devid Zaslav esa oʻz lavozimini tark etdi.

Skydance tarkibiga Paramount Pictures va Warner Bros. kinostudiyalari, Paramount+, HBO Max va Pluto TV striming xizmatlari, shuningdek, CNN, CBS, Nickelodeon, MTV telekanallari va boshqa resurslar kirdi. Kompaniya nazorati ostida "Garri Potter", "Bajarib boʻlmas topshiriq", DC olami va "Uzuklar hukmdori" kabi franshizalar oʻtdi. Yangi tuzilmaning yillik daromadi taxminan 70 milliard dollarga baholanmoqda, uning striminglaridagi umumiy obunachilar bazasi esa 200 milliondan oshadi.

Bitimni yakunlash uchun kompaniya AQSH shtatlarining monopoliyaga qarshi da'volarini hal qilishiga toʻgʻri keldi: Skydance har yili kinoteatrlarda kamida 30 ta film namoyish etish majburiyatini oldi. Shu bilan birga, birlashuvdan keyin konglomeratning umumiy qarzi qariyb 80 milliard dollarni tashkil etdi (Fitch agentligi baholashiga koʻra — 82 milliard dollar). Uch yil ichida Skydance rahbariyati yillik xarajatlarni 6 milliard dollarga qisqartirishni rejalashtirmoqda.