Jakartada Oʻzbekistonga ziyorat turlari uchun subsidiyalar taqdim etildi

«Oʻzbekiston – Indoneziya: turizm, ziyorat va madaniy hamkorlik sohasidagi yangi ufqlari» forumining tashkilotchilari sifatida Turizm qoʻmitasi hamda Oʻzbekistonning Indoneziyadagi elchixonasi ishtirok etdi. Tadbirda ikki mamlakatning turoperatorlari va umra assotsiatsiyalari vakillari qatnashdi.

«Umrah Plus Uzbekistan» dasturi Umra safarini Oʻzbekistonning tarixiy va diniy obidalariga ziyorat bilan birlashtirishni nazarda tutadi. Ushbu yoʻnalish boʻyicha sayohatchilarni jalb qiluvchi operatorlar uchun 2026-yil oxiriga qadar har bir sayyoh uchun 100 AQSH dollari miqdorida toʻlov koʻzda tutilgan. Uchrashuvlar davomida mamlakatlar oʻrtasida toʻgʻridan-toʻgʻri aviaqatnovlarni yoʻlga qoʻyish masalasi ham koʻrib chiqildi.

Forum yakunlariga koʻra, tomonlar Indoneziyaning «Amphuri» va «Astagatra» assotsiatsiyalari bilan hamkorlik toʻgʻrisida memorandumlar imzoladilar. Bundan tashqari, Indoneziya kompaniyalarining Oʻzbekistonning Centrum Holidays, Xorazm Umra Jamiyati, Family Mandarin, Musaffo turizm xizmati, Ziyarah Travel Official va BAIA Transport tuzilmalari bilan sheriklik istiqbollari muhokama qilindi.