Fransiyadagi yuzlab supermarketlarning muzlatkichlariga kiberhujum uyushtirildi

Hujumchilar Daniyaning Danfoss kompaniyasiga tegishli uskunalar sozlamalarini masofadan oʻzgartirib, qurilmalarni haroratni olti soatgacha 50 °C gacha koʻtaruvchi muzdan tushirish rejimiga oʻtkazgan. Bu mahsulotlarning buzilishiga olib keldi, savdo tarmoqlari ularni utilizatsiya qilishga majbur boʻldi, shuningdek, mahalliy yongʻinlar kelib chiqdi.

Butun mamlakat boʻylab bir nechta yirik chakana savdo tarmoqlarining doʻkonlari zarar koʻrdi. Intermarché tarmogʻining egasi — Les Mousquetaires kompaniyasi — 150 ga yaqin doʻkonda nosozlik yuz berganini maʼlum qildi (France24 telekanali 200 tagacha boʻlgan bahoni keltirgan). Coopérative U tarmogʻida 100 ga yaqin savdo nuqtasi jabrlangan, Carrefour riteyleri esa qariyb 6 ming doʻkondan 80 tasiga hujum qilingani haqida xabar berdi. Parij prokuraturasi hodisa koʻlamini, kiberhujumning oziq-ovqat yoʻqotishlari va yongʻin oʻchoqlari bilan bogʻliqligini tekshirmoqda.

Fransiyaning javob choralari koʻrish markazi CERT-FR Danfoss kompaniyasining AK-SM va AK-SC seriyali kontrollerlari buzilgani haqida ogohlantirish berib, boshqaruv interfeysini internetga ochib qoʻyishga yoʻl qoʻyib boʻlmasligini taʼkidladi. Ishlab chiqaruvchi Danfoss zarar koʻrgan tizimlarda eskirgan dasturiy taʼminot oʻrnatilganini maʼlum qildi. Fransiya bosh vaziri Sebastyan Lekornyu topshirigʻiga binoan tergovga ANSSI agentligi ham qoʻshildi, u shuningdek yevropalik hamkorlar bilan harakatlarni muvofiqlashtirmoqda.