Oʻzbekistonda shaxmatchilarning jahon turnirlari medallari uchun mukofotlari oshirildi

Hujjatga koʻra, kattalar oʻrtasidagi Butunjahon shaxmat olimpiadasi va paralimpiadasidagi oltin medal uchun sportchilar 200 ming dollar, murabbiylar esa 50 ming dollar oladi. Kumush medal uchun toʻlov tegishlicha 100 ming va 25 ming dollarni, bronza uchun esa 50 ming va 12,5 ming dollarni tashkil etadi. Ilgari bu summalar bazaviy hisoblash miqdorlarida hisoblangan: birinchi oʻrin uchun sportchiga 2000 BHM, ikkinchi oʻrin uchun 1000 BHM, uchinchi oʻrin uchun 500 BHM toʻlangan.

Ilk bor yoshlar oʻrtasidagi Butunjahon shaxmat olimpiadasi va paralimpiadasi uchun alohida mukofotlar joriy etildi: oltin uchun 20 ming dollar, kumush uchun 10 ming va bronza uchun 5 ming dollar (ustozlarga — tegishlicha 5 ming, 2,5 ming va 1,25 ming dollar).

FIDE tasnifidagi jahon miqyosidagi musobaqalarda gʻoliblarga 15 ming dollar, kumush medal egalariga 7,5 ming, bronza medal egalariga 3,75 ming dollar belgilandi (murabbiylarga — 7 ming, 3,5 ming va 1,75 ming). FIDEning Osiyo miqyosidagi turnirlarida shaxmatchilar oltin uchun 10 ming, kumush uchun 5 ming va bronza uchun 2,5 ming dollar oladi (murabbiylar — 5 ming, 2,5 ming va 1,25 ming). Shaxmatchilarga xalqaro grossmeyster sport unvoni berilganligi uchun avvalgi 100 BHM oʻrniga 5 ming dollar miqdorida bir martalik toʻlov tayinlandi.

Murabbiylarga beriladigan mukofot sportchini soʻnggi bir yil davomida tayyorlagan mutaxassislarga toʻlanadi. Bir necha nafar ustoz ishtirok etgan taqdirda, summa murabbiylar kengashining qaroriga asosan taqsimlanadi.