Oʻzbekistonda shaxmatchilarga jahon turnirlari medallari uchun mukofot pullari oshirildi

Hujjatga koʻra, kattalar oʻrtasidagi Butunjahon shaxmat olimpiadasi va paralimpiadasidagi oltin medal uchun sportchilar 200 ming dollar, murabbiylar esa 50 ming dollar oladi. Kumush medal uchun toʻlov tegishlicha 100 ming va 25 ming dollarni, bronza medali uchun esa 50 ming va 12,5 ming dollarni tashkil etadi. Ilgari bu summalar bazaviy hisoblash miqdorida (BHM) hisoblanar edi: sportchiga birinchi oʻrin uchun 2000 BHM, ikkinchi oʻrin uchun 1000 BHM, uchinchi oʻrin uchun 500 BHM toʻlanardi.

Ilk bor yoshlar oʻrtasidagi Butunjahon shaxmat olimpiadasi va paralimpiadasi uchun alohida mukofotlar joriy etildi: oltin medal uchun 20 ming dollar, kumush uchun 10 ming va bronza uchun 5 ming dollar (murabbiylarga — tegishlicha 5 ming, 2,5 ming va 1,25 ming dollar).

FIDE tasnifidagi jahon miqyosidagi musobaqalarda gʻoliblarga 15 ming dollar, kumush medal egalariga 7,5 ming, bronza medal sohiblariga 3,75 ming dollar belgilandi (murabbiylarga — 7 ming, 3,5 ming va 1,75 ming dollar). FIDE tasnifidagi Osiyo darajasidagi turnirlarda shaxmatchilar oltin uchun 10 ming, kumush uchun 5 ming va bronza uchun 2,5 ming dollar oladi (murabbiylar — 5 ming, 2,5 ming va 1,25 ming dollar). Xalqaro grossmeyster sport unvoni berilganligi uchun shaxmatchilarga avvalgi 100 BHM oʻrniga 5 ming dollar miqdorida bir martalik toʻlov tayinlandi.

Murabbiylarga toʻlanadigan mukofot sportchini oxirgi bir yil davomida tayyorlagan mutaxassislarga beriladi. Bir nechta murabbiy ishtirok etgan taqdirda, mablagʻ murabbiylar kengashi qaroriga muvofiq taqsimlanadi.