Oʻzbekistonda shaxmatchilarga jahon turnirlari medallari uchun beriladigan mukofot pullari oshirildi

Hujjatga muvofiq, kattalar oʻrtasidagi Butunjahon shaxmat olimpiadasi va paralimpiadasining oltin medali uchun sportchilar 200 ming dollar, murabbiylar esa 50 ming dollar oladi. Kumush medal uchun toʻlov tegishlicha 100 ming va 25 ming dollarni, bronza medal uchun esa 50 ming va 12,5 ming dollarni tashkil etadi. Ilgari bu summalar bazaviy hisoblash miqdorida (BHM) hisoblanar edi: sportchiga birinchi oʻrin uchun 2000 BHM, ikkinchi oʻrin uchun 1000 BHM, uchinchi oʻrin uchun 500 BHM toʻlanardi.

Ilk bor yoshlar oʻrtasidagi Butunjahon shaxmat olimpiadasi va paralimpiadasi uchun alohida mukofotlar joriy etildi: oltin uchun 20 ming dollar, kumush uchun 10 ming va bronza uchun 5 ming dollar (murabbiylarga mos ravishda 5 ming, 2,5 ming va 1,25 ming dollar).

FIDE tasnifidagi jahon darajasidagi musobaqalarda gʻoliblarga 15 ming dollar, kumush medal egalariga 7,5 ming, bronza sovrindorlariga 3,75 ming dollar belgilandi (murabbiylarga — 7 ming, 3,5 ming va 1,75 ming). FIDEning Osiyo darajasidagi turnirlarida shaxmatchilar oltin uchun 10 ming, kumush uchun 5 ming va bronza uchun 2,5 ming dollar oladi (murabbiylar — 5 ming, 2,5 ming va 1,25 ming). Shaxmatchilarga xalqaro grossmeyster sport unvoni berilgani uchun avvalgi 100 BHM oʻrniga 5 ming dollar miqdorida bir martalik toʻlov tayinlandi.

Murabbiylarga toʻlanadigan mukofot sportchini oxirgi bir yil davomida tayyorlagan mutaxassislarga beriladi. Bir nechta murabbiy ishtirok etgan taqdirda, summa murabbiylar kengashining qaroriga asosan taqsimlanadi.