Oʻzbekistonda paxta ishlab chiqaruvchilar uchun yangi subsidiyalar eʼlon qilindi

Paxtani birja orqali sotgan fermerlarga va uni sotib olgan klasterlarga har bir tonna uchun 500 ming soʻmdan subsidiya toʻlanadi. Oʻz yer uchastkalarida paxta yetishtiruvchi klasterlar esa bir gektar uchun 1,5 million soʻm miqdorida subsidiya olishlari mumkin boʻladi.

Prezident, shuningdek, masʼul idoralarga tayyor mahsulot eksportchilarining kreditlari boʻyicha foizlarning bir qismini uch yil davomida kompensatsiya qilish boʻyicha hisob-kitoblarni kiritishni topshirdi. Xorijiy valyutadagi qarzlar boʻyicha yillik 5 foizdan, milliy valyutadagi kreditlar boʻyicha esa 14 foizdan yuqori stavkalarni qoplash taklif etildi. Bundan tashqari, hukumat elektron savdo maydonchalari (marketpleyslar) orqali sotilgan toʻqimachilik tovarlari qiymatining 3 foizini qaytarish boʻyicha takliflar ishlab chiqadi.

Yigʻilishda xodimlari soni ming kishidan ortiq boʻlgan korxonalarni qoʻllab-quvvatlash rejalari ham maʼlum qilindi: ularga ishchilarni oʻqitish va ularni tashish xarajatlarining 50 foizigacha qismini kompensatsiya qilish, kamida besh yil ishlaganlarning farzandlari uchun esa oʻqish kontraktini toʻlab berish koʻzda tutilgan. Andijon viloyatining adir hududlarida sanoat bogʻlarini barpo etish uchun «Agrostar» kompaniyasi tashkil etiladi, bunga 30 million dollar hamda suv taʼminoti uchun 200 milliard soʻm ajratiladi.