Oʻzbekistonda 2030-yilga borib elektr stansiyalari quvvatini 46,1 GVtga yetkazish rejalashtirilmoqda

Taqdim etilgan rejaga koʻra, 2030-yilga borib mamlakatda elektr energiyasi ishlab chiqarish yiliga qariyb 129 mlrd kVt·soatga yetishi, 2035-yilga kelib esa generatsiya quvvatlarini yiliga 154,7 mlrd kVt·soat ishlab chiqarish hajmi bilan 57,2 GVtga yetkazish koʻzda tutilgan. Hozirda quyosh va shamol elektr stansiyalarining umumiy quvvati 6,3 GVt dan oshdi, gidroelektr stansiyalari soni esa umumiy quvvati qariyb 2,5 GVt boʻlgan 100 tadan oshdi. 2030-yilga borib faqat sanoatning oʻzida elektr energiyasi isteʼmoli 38 dan 53,5 mlrd kVt·soatgacha oʻsishi prognoz qilinmoqda.

Yangi quvvatlarni integratsiya qilish uchun 2030-yilgacha qariyb 5 ming kilometr yangi elektr uzatish tarmoqlari, 220 kV kuchlanishli toʻqqizta va 500 kV kuchlanishli yettita podstansiya qurish rejalashtirilgan boʻlib, ularning bir qismini ishga tushirish 2027–2029-yillarga moʻljallangan. Shuningdek, sohada umumiy quvvati 4,2 GVt boʻlgan energiyani saqlash tizimlarining 26 ta loyihasi shakllantirilgan, ulardan 17 tasi amalga oshirish bosqichida. Qoraqalpogʻistonda 220 kV kuchlanishli podstansiya va elektr uzatish tarmogʻini qurish orqali shamol stansiyalarini 1 GVt quvvatga ega maʼlumotlar markazlari (data-markazlar) bilan bogʻlash taklif etildi.

Bundan tashqari, investitsiyalar bilan ishlashning yangi sxemasi taqdim etildi. Loyihalarni oldindan ajratilgan yer uchastkasi va tarmoqlarga ulanish nuqtasi bilan talab prognozlaridan kelib chiqqan holda shakllantirish, investorlarni esa ochiq raqobatli tanlov orqali aniqlashga qaror qilindi. Iqtisodiyot va moliya vazirligi talabni prognozlash, Energetika vazirligi strategik rejalashtirish va texnik siyosat, Energetika bozorini rivojlantirish va tartibga solish agentligi esa bozor munosabatlari hamda tariflar bilan shugʻullanadi.