Qoraqalpogʻistonda oltin qazib olish va uni qayta ishlash klasteri tashkil etiladi

Davlat rahbari geologiya-qidiruv ishlari hudud maydonining atigi 20 foizini qamrab olganini, shu sababli yirik investorlarning qiziqishi ortib borayotgan bir sharoitda xomashyo zaxiralari toʻgʻrisida maʼlumotlar yetarli emasligini taʼkidladi. U Qoraoʻzak tumanidagi "Urusoy" konida xitoylik investor tomonidan amalga oshirilayotgan loyihani misol qilib keltirdi. 33 million dollar va texnologiyalar kiritgan kompaniya 200 gektarlik maydonda 4 tonna oltin zaxirasini aniqladi hamda 320 nafar kishini ish bilan taʼminladi.

Prezident masʼul shaxslarga bir oy muddatda investorlar tomonidan koʻtarilgan masalalarni hal etish, klaster tashkil qilish, geologiya-qidiruv ishlarining kompleks dasturini tayyorlash va hududdagi konlar zaxiralarini qayta baholash boʻyicha topshiriq berdi.

Bundan tashqari, yigʻilishda xomashyoni chuqur qayta ishlash masalasi muhokama qilindi. Rasmiylarning baholashiga koʻra, Boʻzatov tumanidagi "Kushkanatov" konida mirabilitni qayta ishlash yiliga 45 ming tonnagacha natriy sulfat ishlab chiqarish, astraxanitni qayta ishlash esa magniy sulfat olish imkonini beradi. Shuningdek, Beruniy tumanida kristalli kremniy ishlab chiqarish va yiliga 25 million dollarlik eksportni amalga oshirish maqsadida kvarsit konini oʻzlashtirish boʻyicha Germaniya kompaniyasining 30 million dollarlik investitsiya loyihasi haqida maʼlum qilindi. Kimyo sanoatiga masʼullarga avval rejalashtirilgan 400 million dollarlik loyihalarga 200 million dollarlik yangi tashabbuslarni qoʻshish hamda 5000 ta ish oʻrni yaratish topshirildi.